Kryeministri izraelit Benjamin Netanyahu i është nënshtruar një operacioni urgjent për të vendosur një stimulues kardiak, pasi u dërgua në spital mbrëmjen e së shtunës.
Mjekët në Qendrën Mjekësore Sheba thanë se procedura shkoi mirë dhe ai e ka kaluar rrezikun për jetë, shkruan BBC.
Shtrimi i Netanyahut në spital vjen përpara një votimi kyç në parlament për reforma të reja në gjyqësor.
Protestat kundër reformës kanë përfshirë Izraelin, derisa shumë punëtorë janë zotuar për grevë nëse projektligji shkon përpara.
Në një fjalim përmes një video përpara operacionit gjatë natës, Netanyahu tha se ndihej
“shkëlqyeshëm”, por po dëgjonte mjekët e tij.
Kishte pasur pyetje në rritje për shëndetin e tij pasi ai u shtrua në spital javën e kaluar duke vuajtur nga dehidrimi.
Operacioni shkoi pa probleme “pa asnjë ndërlikim”, tha Prof Roy Beinart nga Qendra Mjekësore Sheba, duke shtuar se Netanyahu “nuk kishte rrezik për jetën”.
Zyra e tij tha se Netanyahu pritej të lirohej më vonë të dielën, por udhëtimet e planifikuara në Qipro dhe Turqi do të riplanifikoheshin.
Në 48 orët e ardhshme pritet të mbahet një votim kritik mbi planet e qeverisë së tij për ndryshime në gjyqësor. Ka pasur protesta me muaj në Izrael për reformat, të cilat synojnë të kufizojnë kompetencat e Gjykatës së Lartë.
Votimi – që pritet të zhvillohet të hënën – do të jetë një përballje midis koalicionit fetar-nacionalist të vijës së ashpër dhe një pjese të shoqërisë izraelite. Parlamenti filloi debatin për projektligjin shumë të kontestuar të dielën.
Ditët e fundit kanë parë dhjetëra mijëra protestues që marshojnë nga Tel Avivi në Jerusalem për të kundërshtuar ndryshimet e sistemit të drejtësisë, me njerëz që mbushin autostradën kryesore.
Shumë protestues u ngritën në parkun Sacher në Jerusalem, pranë parlamentit, pas marshimit katër-ditor.
