Ministrja e Arsimit, Shkencës, Teknologjisë dhe Inovacionit, Arbërie Nagavci, zëvendësshefi për Bashkëpunim në Zyrën e Bashkimit Evropian në Kosovë, Alesandro Biankardi dhe Rektori i Universitetit të Prishtinës “Hasan Prishtina”, Arben Hajrullahu vizituan objektin e Fakultetit të Shkencave Matematike dhe Natyrore, për të parë ecurinë e realizimit të këtij projekti, me ç’rast u pritën nga profesorë dhe studentë të shumtë.
Ministrja Arbërie Nagavci me këtë rast ka thënë se, objekti i ri pritet të përmbushë standardet më të larta dhe do të kontribuojë për një të ardhme më të mirë për studentët dhe kërkimin shkencor.
Ministrja Nagavci, falënderoi të gjithë ata që janë angazhuar në këtë projekt dhe i’u uroi suksese studentëve dhe të gjithë atyre që kanë kontribuar në realizimin e këtij qëllimi madhor, duke thënë se, pret me padurim që ky objekt të bëhet një pjesë e rëndësishme e zhvillimit të mëtejshëm akademik dhe shkencor.
Ajo rikujtoi se, në kuadër të politikave mbështetëse për arsimin e lartë, janë ndarë 1 milion euro për objektin e FShMN-së, janë liruar nga pagesat semestrale mbi 170,000 studentë, janë ndarë bursa për mbi 16,000 studentë, me vëmendje të veçantë për vajzat dhe studentët me nevoja të veçanta, si dhe është ofruar mbështetje si asnjë herë më parë në mundësimin e pjesëmarrjes në programe të ndryshme ndërkombëtare dhe në rrafshin e kërkimit shkencor.
Ndër të tjera, Nagavci ka shprehur mirënjohje ndaj partnerëve tanë, si Bashkimi Evropian dhe UNOPS, që na kanë qenë mbështetës gjatë gjithë këtij procesi.
Zëvendësshefi për Bashkëpunim në Zyrën e BE-së në Kosovë, Alesandro Biankardi, theksoi rëndësinë e gjithëpërfshirjes së palëve të interesit gjatë gjithë ciklit të projektit, për të garantuar sukses dhe qëndrueshmëri afatgjate.
Ai vuri në dukje se arsimi cilësor është një ndër prioritetet e BE-së në Kosovë, gjë që reflektohet në politikat dhe instrumentet financiare të saj, përfshirë IPA-n dhe mekanizmin për reformë dhe rritje, duke shtuar se, investimi prej pothuajse 12 milionë euro në ndërtimin e objektit të ri të FShMN është një dëshmi e qartë e këtij përkushtimi.
Ndryshe, realizimi i projektit për objektin e ri të FShMN-së është një bashkëpunim midis Bashkimit Evropian, Universitetit të Prishtinës dhe Ministrisë së Arsimit, Shkencës, Teknologjisë dhe Inovacionit.
