Ministri i Financave, Punës dhe Transfereve, Hekuran Murati përmes një konference për media ka folur në lidhje me rezultatet e punës së ATK-së për gjashtë muaj.
Ai me këtë rast i ka përgëzuar stafin e ATK-së si dhe qytetarët për këtë arritje.
“I përgëzoj ATK dhe stafin për arritjet në gjashtë mujor, po ashtu edhe tatim paguesit sepse janë ata që e mbajnë shtetin dhe ATK-në në këmbë, secili që paguan me rregull është kontributor i këtij shteti”, tha ai.
Tutje, ai u shpreh se për të rritur suksese ATK-ja dhe shteti, duhet të ketë besim në institucione.
“Për të rritë suksesin e ATK-së dhe shtetit është parakusht që të ketë besim në institucione, sepse atëherë qytetari e sheh se kur paguan tatime dhe ato para nuk keqpërdoren ka besim më të lartë”, u shpreh Ministri Murati.
Ai kërkoi nga qytetarët ndihmë që çdo biznes që nuk lëshon kupon fiskal të lajmërohet në ATK.
“Çdo cent që mblidhet nga shteti kthehet te qytetari. Njësoj siç bëhet lajm për parkimin e veturës keq, bëhet lajm edhe kur nuk lëshohet kuponi fiskal nga biznesi”.
Drejtori i Përgjithshëm i ATK-së, Ilir Murtezaj sot në një konferencë për media, ka prezantuar rezultatet e aktiviteteve të zhvilluara për periudhën janar-qershor 2022.
Murtezaj tha se ATK mblodhi 355.5 milionë euro tatime, në krahasim me planin ka rritje për 26.5 milionë euro apo 8.1%.
