Ministri i Bujqësisë, Pylltarisë dhe Zhvillimit Rural, Faton Peci nuk ka pushuar as ditën e diel dhe ka dalë në terën, me ç‘rast ka vizituar bujqit nga Drenica.
Në fakt kësaj radhe ministri Peci ka vizituar në orët e paradites një bujk nga Abria e Poshtme e Drenicës
“Mirëmëngjesi ju themi bashkë me fermerin e vyer Arben Avdiu, nga Abria e Poshtme e Drenicës. Tani e shumë vite, familja Avdiu kultivon fidane të perimeve: speca, tranguj, domate, dredhëza etj. Këtë vit synon që t’i kultivoj rreth 100 mijë fidanë. Gjithashtu veprimtari e kësaj familjeje janë edhe lulet dhe drunjtë dekorativ. Arben Avdiu është një fermer shembull i cili kujdeset edhe për fermerët tjerë me ofrimin e shërbimeve këshillimore, ngase ai ka 20 vite që merret me këtë veprimtari”, ka shkruar Peci.
Ai në këtë rast tha se Ministria e Bujqësisë, Pylltarisë dhe Zhvillimit Rural (MBPZHR) është e do të jetë gjithmonë në shërbim të fermerëve të Kosovës.
Sipas tij, rezultatet tashmë po vërehen në çdo cep të Republikës.
“Në Drenicë sipas fermerëve ka toka bujqësore të punuara, më shumë se asnjëherë më parë e ne e presim përfundimin e procesit të aplikimit për të vërtetuar një gjë të tillë. Ndjeshëm po rritet edhe prodhimtaria e ushqimeve bio, që është edhe një objektiv madhor e ne po e shoqërojmë edhe me politika e masa shtesë të përkrahjes financiare”, tha ai.
Së bashku me Agjencinë e Ushqimit dhe Veterinës ministri Faton Peci tha se do të monitorojnë me kujdes punën e fermerëve në kuadër të angazhimit që sasia i pesticideve të jetë në nivelet e lejuara sipas parametrave të bujqësisë.
“Jemi në shërbim të fermerit, në shërbim të Kosovës”.
