Pas më shumë se një dekadë me premtime rrebesh që jepeshin vit pas viti e nëpër fushata nga politikanë e subjekte politike, procesi i liberalizimit të vizave për Kosovën u finalizua vetëm në muajin prill 2023 dhe u përmbyll me botimin e dokumentit në Gazetën Zyrtare të Bashkimit Evropian më 25 prill.
Me këtë veprim kështu është përmbyllur edhe formalisht i gjithë procesi i vizave për qytetarët e Kosovës dhe më së largu nga 1 janari i vitit 2024 kosovarët do të udhëtojnë pa viza në atë që njihet si zona Schengen dhe përbëhet prej 27 shtetesh evropiane, por duke shtuar edhe disa shtete tjera që nuk janë në këtë zonë.
Ky lajm nxiti reagime të shumta nga krerët institucionalë dhe të politikës vendore, ndërsa erdhën urime të shumta nga qeveri e ambasadorë të vendeve mike të Kosovës, duke dhënë vlerësime të larta për këtë ngjarje.
E një vlerësim për këtë ngjarje shumë të rëndësishme ka dhënë këto ditë edhe politikani Enver Hoxhaj, i cili që nga shpallja e pavarësisë ka mbajtur pozita të larta shtetërore si zëvendëskryeministër, ministër i Jashtëm dhe ministër në dikaster tjerë qeveritar.
Hoxhaj që aktualisht është deputet i Kuvendit të Kosovës nga radhët e Partisë Demokratike të Kosovës (PDK) në një paraqitje në televizionin publik RTK para dy ditësh, vendimin historik që i dha fund izolimit të Kosovës, nuk e vlerësoi si dikur kur mbante poste qeveritare.
“Përveç vendosjes së Kosovës në agjendë për t’u bërë shtet anëtar i Këshillit të Evropës dhe vendimit i cili është përmbyllur, që qytetarët e Kosovës të udhëtojnë pa viza drejt vendeve të BE-së, Kosova nuk do të ketë ndonjë përfitim tjetër. Dhe kam përshtypjen se qasja që po ndjek aktualisht kryeministri Kurti në raport me BE-në nuk ka të bëjë me veriun, por ka më shumë të bëjë se si të del mirë para qytetarëve të Kosovës në Jug të Lumit Ibër e deri në Dragash e Prizren, por një politikë që do ta riintegronte veriun në institucionet e Kosovës, do të duhej të dukej ndryshe…”, ka thënë mes tjerash Hoaxhaj.
Sido qoftë duhet kujtuar se për këtë proces në Kosovë përgjatë shumë viteve janë mbajtur fushata e dhënë premtime rrebesh nga politikanë e subjekte politike, duke fituar edhe pushtet në emër të saj.
Në këtë valle të premtimeve ka qenë i futur dikur edhe vetë politikani Enver Hoxhaj, i cili në paraqitje nëpër debate në vitin 2014 gjatë fushatës jepte premtime për vizat.
Ndërsa para 8 vitesh, më saktësisht më 4 maj 2016 jHoxhaj epte lajmin “historik” për Kosovën, respektivisht fundin e izolomit dhe heqjen e vizave, por të cilat ndodhën vetëm tash më 2023.
“FUND IZOLIMIT – PA VIZA. Lajmi tjetër historik për Kosovën në më pak se 24 orë. KE-ja përfundimisht ka marrë vendim për heqjen e vizave për qytetarët e Kosovës duke thyer murin e padrejtë ndaj nesh këto vitet e fundit”, shkruante mes tjerash Hoxhaj në rrjetin social, për diçka që nuk ndodhi atëbotë.
Ngecja për shumë vite – ambasadori francez tregon si erdhi deri te heqja e vizave
Për vite të tëra procesi i liberalizimit të vizave për qytetarët kosovarë ngeci mes tjerash edhe për arsye të skepticizmit të disa shteteve anëtare të BE-së, si Franca e Holanda, të cilat votonin kundër heqjes së vizave për Kosovën.
Për këtë shkak zyrtare nga Qeveria e Kosovës nën drejtimin e kryeministrit Albin Kurti, kanë thënë se dy vitet e fundit ka punuar shumë dhe në mënyrë intensive me këto shtete, për të ndryshuar qëndrim karshi Kosovës.
Se angazhimi si me punët brenda vendit dhe në raport me vendet e BE-së ka pasur sukses, e pohon më direkt vetë ambasadori Francës në Kosovë, Olivier Guerot, duke përmendur edhe masat të cilat i ka ndërmarrë Qeveria e Kosovës.
”Pikërisht në bazë të masave të marra nga Qeveria e Kosovës, Presidenti Macron u pajtua për liberalizimin e vizave verën e kaluar”, ka shkruar ai në Twitter.
