Kryeministri i Kosovës, Albin Kurti, ka paralajmëruar qytetarët për një natë kritike sa i përket qarkullimit rrugor, për shkak të rënies së ndjeshme të temperaturave dhe rrezikut nga ngricat.
Sipas tij, kontrasti i madh i temperaturave, me parashikime që ato të zbresin deri në –9 gradë Celsius, pritet të krijojë kushte të rrezikshme në rrugë, pasi sipërfaqet e lagura nga shiu mund të ngrijnë gjatë natës.
“Kjo paraqet rrezik të shtuar për qarkullimin, andaj u bëjmë thirrje qytetarëve që të shmangin lëvizjet e panevojshme”, ka deklaruar Kurti.
Ai ka bërë të ditur se të gjitha kompanitë e mirëmbajtjes së rrugëve janë vazhdimisht në terren dhe po angazhohen maksimalisht për të lehtësuar qarkullimin dhe për të garantuar siguri.
Kryeministri ka rikujtuar gjithashtu se zbatimi i ligjit për sezonin dimëror është i domosdoshëm, duke theksuar nevojën për pajisjen e automjeteve me goma dimërore dhe zinxhirë.
“Nëse qytetarët detyrohen të qarkullojnë sonte, atëherë patjetër duhet të vozisin me kujdes të shtuar dhe t’u përshtaten kushteve atmosferike”, ka apeluar ai.
Në fund, Kurti ka kërkuar bashkëpunimin e qytetarëve për rritjen e sigurisë së përgjithshme në trafik, duke theksuar se institucionet po bëjnë maksimumin për t’u dalë në ndihmë.
