Kryeministri në detyrë i Republikës së Kosovës, Albin Kurti, ka marrë pjesë sot në ushtrimin fushor ndërkombëtar “Defender Europe 2025”, i cili po zhvillohet në Babaj të Bokës dhe në zona të tjera ushtarake të vendit. Ky ushtrim përfshin forcat e NATO-s dhe të vendeve partnere, ndërsa Kosova këtë vit ka rolin e nikoqirit, duke dëshmuar rritjen e kapaciteteve dhe besueshmërisë në arenën ndërkombëtare të sigurisë.
Në fjalën e tij para pjesëtarëve të Forcës së Sigurisë së Kosovës dhe trupave ndërkombëtare, Kryeministri Kurti deklaroi:“Bashkë jemi jo vetëm të fortë, por shumë më të fortë. Shteti i Kosovës kurrë nuk ka qenë më i fuqishëm dhe më i sigurt.”
Ai theksoi se pjesëmarrja aktive dhe pritja e ushtrisë së SHBA-së dhe të aleatëve të NATO-s në territorin e Kosovës është një dëshmi e përkushtimit të vendit për sigurinë rajonale dhe për anëtarësimin e ardhshëm në aleancën veri-atlantike.
Një nga pikat kulmore të këtij ushtrimi është vendosja e Komandës së Divizionit të 28-të të Këmbësorisë së Ushtrisë së Shteteve të Bashkuara të Amerikës në aeroportin ushtarak të Gjakovës, nga ku komandohen të gjitha brigadat që operojnë në Evropën Juglindore.
“Ne po vërtetojmë çdo herë e më shumë fuqinë dhe aftësitë tona, si dhe ndërveprueshmërinë që kemi me NATO-n. Anëtarësimi ynë në këtë aleancë nuk është vetëm për dobinë tonë, por edhe për kontributin që mund të japim,” shtoi Kurti, duke shprehur krenari për profesionalizmin e FSK-së dhe mirënjohje për partnerët ndërkombëtarë, në veçanti për Shtetet e Bashkuara të Amerikës.
“Defender Europe 2025” konsiderohet një nga ushtrimet më të rëndësishme të këtij viti në Evropë, dhe pjesëmarrja e Kosovës në të tregon për një stad të ri të sigurisë dhe bashkëpunimit ushtarak ndërkombëtar.
