Në Ditën Botërore të Tokës, kryeministri në detyrë Albin Kurti ka njoftuar themelimin e Gardës për Mbrojtjen e Natyrës, duke e cilësuar këtë si një hap të rëndësishëm drejt forcimit të rolit të shtetit në mbrojtjen e mjedisit.
“Garda për Mbrojtjen e Natyrës është shprehje e një ndryshimi të thellë në mënyrën se si e kuptojmë shtetin. Një shtet që nuk është spektator, por veprues. Një shtet që nuk reagon vonë, por parandalon me kohë”, ka deklaruar Kurti.
Ai theksoi se për vite me radhë natyra në Kosovë është keqtrajtuar për shkak të mungesës së kontrollit institucional.
“Aty ku ka munguar shteti, ka hyrë abuzimi. Aty ku ka munguar ligji, ka dominuar interesi i ngushtë”, ka thënë ai.
Kurti kujtoi edhe investimet e qeverisë në rregullimin dhe pastrimin e lumenjve në vend.
“Mandatin e kaluar janë ndarë mbi 10 milionë euro për rregullimin e shtretërve të lumenjve si dhe për pastrimin e tyre”, u shpreh ai, duke përmendur ndërhyrjet në lumenj si Lumbardhi i Deçanit, Lumi Shtimjana, Lumi Llap, Sitnica, Ibër dhe të tjerë në disa komuna të Kosovës.
Sipas tij, qeveria do të vazhdojë me masa të ashpra ndaj ndotësve dhe me krijimin e një sistemi modern të menaxhimit të mbeturinave.
“Ashtu siç jemi zotuar, do të mbyllim të gjitha deponitë ilegale dhe do të krijojmë një sistem të ri, modern e të sigurt për menaxhimin e mbeturinave”, ka theksuar Kurti.
Ai njoftoi gjithashtu miratimin e Projektligjit për Inspektoratin në fushën e mjedisit dhe mbrojtjes natyrore.
“Para tre javësh, në Qeveri e kemi miratuar Projektligjin për Inspektoratin në fushën e mjedisit, ujërave, natyrës… si veprim konkret për mbrojtje të ambientit ku jetojmë”, tha ai.
Në fund, Kurti theksoi rëndësinë e bashkëpunimit qytetar-institucional për mbrojtjen e natyrës.
“Garda për Mbrojtjen e Natyrës është një aleancë ndërmjet qytetarëve dhe shtetit… Ne besojmë se mbrojtja e natyrës nuk është pengesë për zhvillimin, por kusht për zhvillim të qëndrueshëm”, u shpreh Kurti.
