Kryeministri i Kosovës, Albin Kurti, ka bërë të ditur se në mbledhjen e dytë të Qeverisë, në javën e dytë të qeverisjes, janë marrë gjithsej 12 vendime me rëndësi institucionale dhe strategjike.
Sipas tij, ndër vendimet kryesore ishte themelimi i Këshillit Shtetëror për shënimin e 28-vjetorit të Epopesë së Ushtrisë Çlirimtare të Kosovës, si dhe miratimi i Programit të Projektligjeve për vitet 2026–2028. Në këtë program, ndër të tjera, përfshihen Projektligji për Byronë Shtetërore për Konfiskimin e Pasurisë së Pajustifikueshme dhe Projektligji i ri për Çmimet Tavan, të cilat Kurti i cilësoi si zotime dhe nevoja të vendit dhe qytetarëve.
Ai njoftoi gjithashtu për miratimin e Projektligjit për Ratifikimin e Marrëveshjes për Qasje në Arsimin e Lartë dhe Pranim për Studime në Ballkanin Perëndimor, në kuadër të Procesit të Berlinit.
Në të njëjtën mbledhje, Qeveria miratoi edhe pakon e 19-të të sanksioneve të Këshillit të Bashkimit Evropian ndaj Federatës Ruse dhe Bjellorusisë.
Po ashtu, janë themeluar dy ndërmarrje të reja lokale për ofrimin e shërbimeve publike: “Fushë-Kosova” Sh.A. në Fushë Kosovë dhe “Eko-Drenasi” Sh.A. në Drenas.
Kurti bëri të ditur edhe themelimin e Zyrës për Ekspertizë, Zbatim dhe Mbikëqyrje Strategjike, e cila sipas tij do të rrisë llogaridhënien, do të forcojë koordinimin mes ministrive dhe do të sigurojë që çdo euro e buxhetit të shndërrohet në ndikim real për qytetarët.
