Kryeministri i Kosovës, Albin Kurti, ka thënë se Kosova dhe Serbia duhet të ndjekin një marrëveshje për të përmirësuar marrëdhëniet para se aleatët të nisin me zgjedhjet në Shtetet e Bashkuara dhe në Bashkimin Evropian.
“Është një ndjenjë e urgjencës për të zbatuar marrëveshjen dhe për të normalizuar marrëdhëniet midis Kosovës dhe Serbisë, të fokusuar në një njohje të ndërsjellë de-facto, më së voni deri në pranverën e vitit të ardhshëm”, ka deklaruar Kurti në një intervistë për “Bloomberg” në Slloveni.
Përveç urgjencës për zbatim të marrëveshjes së normalizimit, Kurti ka thënë se është i gatshëm edhe për organizimin e zgjedhjeve të reja komunale në veri, sipas marrëveshjes së arritur me emisarin e posaçëm të Bashkimit Evropian, Miroslav Lajçak.
Kurti, ndodhet aktualisht në Slloveni për pjesëmarrje në Forumin e Bledit.
Një konfrontim i fundit ndodhi mes tij dhe kryeministres serbe, Ana Bërnabiq, ku Kurti ka akuzuar Serbinë për mungesë të progresit në zbatimin e marrëveshjes së normalizimit, ndërkohë që Bërnabiq kontestoi shtetësinë e Kosovës.
Pas kësaj deklarate, Kurti ka thënë se Kosova ka vënë sanksione ndaj Rusisë, ndërsa Serbia as nuk po i mendon dhe nuk janë distancuar nga Millosheviqi as nga Putini.
Gjatë kësaj deklarate të Kurtit kanë duartrokitur të pranishmit, teksa ka thënë se “nuk është e lehtë për ne. Dua t’i normalizoj marrëdhëniet dhe do ta bëja menjëherë këtë, nëse fqinjët e mi do ishin çekë e jo serbë”.
Kjo ngjarje ndodhi gjatë një paneli ku morën pjesë edhe kryeministrat e vendeve të tjera, si Shqipëria, Bullgaria, Kroacia, Maqedonia e Veriut, dhe Bosnjë-Hercegovina.
Në këtë forum u përmbyllën pozicionet e dy shteteve, të cilat pritet të kthehen në tavolinën e bisedimeve shumë shpejt, pas njoftimeve nga Bashkimi Evropian se dialogu do të intensifikohet në shtator.
