Kryetari i PDK-së, Memli Krasniqi, ka kritikuar kryeministrin e Kosovës, Albin Kurti, për Marrëveshjen e arritur me Serbinë.
Krasniqi ka thënë se kryeministri i Kosovës, Kurti me një fjali mbrëmë “ka përmbysur gjithë jetën e tij politike”.
“Çka ka çka s’ka kryeministër? A ka Zajednicë, Asociacion. Sepse me një fjali mbrëmë kryeministri i Kosovës e përmbysi krejt jetën e tij politike, por së paku e uroj për sinqeritetin. Po ka Asociacion, siç e tha mbrëmë ky. Ka pasur Asociacion sa herë që ka thënë se s’ka. Loja me fjalë e ka afatin e skadimit. Fjalët skadojnë kur duhet të ndërmarrësh veprime, e kryeministri i ka marrë veprimet mbi vete. E për ironi të fatit të Kosovës, sepse të tij nuk ka rëndësi, e bëri atë në vilën e Josip Broz Titos, kasapit të shqiptarëve, ai ka pranuar krejt ato që ka premtuar se nuk do t’i pranonte. Kapërcim më të madh në politikën shqiptare s’ka bërë asnjë. Prej vetëvendosje e jo negociata, kalove në po negociata e vetëvendosje për serbët e Kosovës. Ndoshta kryeministri s’ka bërë tradhti kombëtare, por ndaj ndjekësve, e votuesve të tij e militantëve, po”, ka thënë Krasniqi në Kuvend.
Krasniqi ka thënë se Kurti është fajtor për degradimin e procesit të dialogut.
“Nga marrëveshja finale gjithpërfshirëse me njohjen e ndërsjellë në qendër, sot jemi në marrëveshje të përkohshme, pjesshme me autonomi në qendër. Ky degradim është absolutisht përgjegjësi e kryeministrit Kurti. Degradimi i pricesit e ardhja në këtë pikë është faji i tij. Situatën e ka krijuar kryeministri e jo Kurti. S’ka pikur prej qielli. Para një viti ka mundur me pasur marrëveshje më të mirë, tekst që se pranon mosnjohjen nga Serbia. Ai me arrogancën e shpërfilljen për të gjithë, me gabimet e njëpasnjëshme, e ka sjellë edhe situatën ku partnerët kanë humbur ambiciet për marrëveshje finale e njohje ndërsjellë. Ishte arrogant, nuk u koordinua e mendoi se krejt botën mundet me bind qysh mendon ky”, tha Krasniqi, duke thënë se vitin e kaluar përqendrimi kishte qenë në menaxhim të krizave. “Prej verës të kaluar deri në fund të vitit vetëm kriza pas kriza shkaktuan, herë Kurti e herë Vuçiqi, si me u marr vesh. E kemi situatën tash si e kemi”.
Krasniqi ka shtuar se me marrëveshjen e re komunitetit serb në Kosovë i ofrohet autonomi politike.
“Jo autonomi territoriale, se nuk lidhet Shtërpca me Leposaviqin, por politike po dhe me kompetenca ekzekutive. Modelet evropiane që po i shqyrton kryeministri nuk funksionojnë në Kosovë, sepse Serbia nuk na njeh dhe ka pretendime territoriale ndaj nesh. Autonomia politike dhe ekstraterritorialiteti për Kishën Serbe është shkatërrimi i të ardhmes së Republikës sonë”, tha Krasniqi. “Kryeministri tha se s’flet me Qeverinë e Serbisë për Kishën. Normal që nuk flet, duhet të flasësh me Sinodën e shenjtë e ajo ka pretendime më të rënda se Vuçiqi. Pse duhet të flasësh me ta. Po e çan themelin e shtetit të Kosovës që është Pako e Ahtisaarit”, ka thënë Krasniqi.
