“Raportet mes Kurtit dhe Ramës janë lënduar“, ka thënë kryeparlamentari i Kosovës, Glauk Konjufca, pas takimit që kishte me Edi Ramën.
Ai ka folur para mediave pas takimit ku ka thënë se së shpejti do të ketë takim Kurti – Rama, duke mos përmendur kohën.
Po ashtu, ai ka kërkuar nga Shqipëria që Kosovën mos ta shohin si fajtore në Veri.
“Biseduam për zhvillimet në vend dhe situatën politike si dhe ndihmën e domosdoshme që e presim nga Shqipëria. Po bëjmë përpjekje që janë shtetërore dhe kushtetuese. Janë përpjekje për të vendosur rend dhe ligj. Mos ta shohin Kosovën si fajtore në këtë mes sepse nuk ka faj”, ka thënë ndër tjerah Konjufca.
“Rama ishte i shqetësuar sa i përket presionit ndërkombëtar, por mua ma la përshtypjen se ai po e përjeton presionin më shumë se ne. Ne nuk kemi probleme shtetërore me Shqipërinë. Problemi ka ardhur nga ana e Shqipërisë, ata pa kurrfarë arsye madhore e anuloi një mbledhje të shumëpritur, mbledhjen e dy qeverive. Nuk mendoj që është hakmarrje”, tha kryeparlamentari.
