Komuna e Podujevës pritet të bëhet me zyrë për investime të huaja.
Kërkesën këtë zyrë ose për drejtori të veçantë e ka bërë këshilltari i Organizatës së Ballit Kombëtar Demokrat (OBKD), Gazmend Islami në seancën e Kuvendit Komunal. Ka thënë se kjo është në të mirë të komunës dhe qytetarëve të Podujevës.
“Ideja ka qenë sepse jemi lodh shumë nga politika. E dimë që rajoni jonë është i varfër. Ideja është që me i ndalë të rinjtë mos të migrojnë. Këtë zyrë, është mirë që secili prej nesh të punojmë bashkërisht për thithjen e investime nga jashtë. Hapja e vendeve të reja të punës e ndalë migrimin. Po mundohemi vazhdimisht që me sjellë investitorë të jashtëm”, ka thënë Gazmend Islami. “Unë i kisha propozua edhe këtij Kuvendi që komuna jonë një herë në fundvit të bëhet nikoqire e investuesve ku bashkërisht mund të bëjmë festa qoftë për ata shqiptarë, qoftë gjermanë, apo italianë që të bëhet nën patronazhin e kryetarit. Kjo do t’i shkëmbente edhe idetë po edhe çka ofron komuna”.
Mbështetje kësaj ideje i ka dhënë kryetari i Komunës së Podujevës, Shpejtim Bulliqi. Ai ka theksuar se çështja e zyrës është çështje e brendshme e ekzekutivit dhe nuk ka nevojë të votohet në Kuvend, shkruan koha.
“Mendoj që është propozim i qëlluar dhe me vend. Ne kemi bisedua bashkërisht për këtë çështje dhe unë jam pro kësaj ideje. Unë mund ta marr përsipër që brenda Drejtorisë së Zhvillimit Ekonomik ta krijoj një zyre të veçantë për investime të huaja. Le të bëhet ajo prej një, dy, tre (punëtorë), varësisht sa është e nevojshme t’i ketë kjo zyrë. Por, ka mundësi që ta parashohim brendapërbrenda organizimit të brendshëm”, ka deklaruar Bulliqi.
Sipas tij, nëse mendohet të themelohet drejtori, atëherë kjo domosdoshmërish lidhet me ndryshimin e Statutit të Komunës, për të cilën gjë duhen 2/3.
“Thënë të drejtën ndoshta ka pas nevojë pak me punua në të (Statut), por kjo varet se e kanë gatishmërinë partitë politike për këtë”.
