Katër persona janë ndaluar lidhur me rastin e rrëmbimit që kishte ndodhur më 19 shtator 2025, në lagjen Veternik të Prishtinës, kanë bërë të ditur përmes një komunikate të përbashkët Policia e Kosovës dhe Inspektorati Policor i Kosovës.
“Pas veprimeve hetimore të ndërmarra nga hetuesit policor dhe identifikimit të personave të dyshuar lidhur me rastin ka rezultuar se në këtë rast dyshohet të jetë i përfshirë edhe një zyrtar policor. Menjëherë pas kësaj është njoftuar Inspektorati Policor i Kosovës (IPK), të cilët në bashkëpunim me hetuesit e Njësisë së Hetimeve të Përgjithshme në Prishtinë kanë arrritë të sigurojnë prezencën e personave të dyshuar. Gjatë veprimeve hetimore janë sekuestruar një armë zjarri dhe një lodër (imitim i armës AK-47)”, thuhet në komunikatë.
Me vendim të Prokurorisë Themelore në Prishtinë, katër të ndaluarve i është caktuar masa e ndalimit prej 48 orësh, ndërsa për zyrtarin policor është rekomanduar edhe suspendim nga detyra si pjesë e procedurave administrative.
Tutje thuhet se hetuesit policor dhe ata të IPK-së, në koordinim të plotë me Prokurorinë Themelore, po vazhdojnë veprimet e mëtejme hetimore me qëllim të ndriçimit të plotë të këtij rasti, derisa numri i përgjithshëm i personave të arrestuar lidhur me këtë rast ka arritur në tetë.
