Ministri i Shëndetësisë i Republikës së Kosovës, Rifat Latifi, i ka takuar të premten aktivistë të organizatës Gift of Life, me ç’rast kanë koordinuar punët me rastin e ardhjes së një ekipi të mjekëve të huaj për operimin e disa fëmijëve me probleme në zemër.
Në fakt ministri Latifi ka takuar Albana Krasniqin, drejtoreshë e organizatës Gift of Life Interantional dhe koordinatore për Kosovën, si dhe Mazllum Belegun, po ashtu aktivist dhe humanist në këtë organizatë.
“Ky takim është realizuar në kuadër të përgatitjeve dhe koordinimit të punëve, për ardhjen e ekipit të mjekëve nga data 10 deri më 17 shtator 2022, në Prishtinë, dhe të cilët janë pjesë e organizatës Gift of Life. Ky ekip i mjekëve do të operojnë falas disa fëmijë, të cilët kanë probleme në zemër, dhe që shërimi i tyre tashmë është bërë i mundur në Kosovë”, thuhet nga Ministria e Shëndetësisë.
Bëhet e ditur se ky mision i këtij ekipi të mjekëve, do të mbështetet me mjete financiare nga biznesmeni, humanisti dhe atdhetari i njohur, shqiptaro-amerikani, Harry Bajraktari.
Me këtë rast ministri Latifi, falënderoj të dy humanistët nga organizata Gift of Life Interantional për kontributin dhe angazhimin e vazhdueshëm të tyre, në shërimin e fëmijëve.
Ai tha se këto operime jo vetëm se nuk janë të mundshme të bëhen në Kosovë, por janë edhe tejet të kushtueshme dhe organizata Gift of Life International i ka mundësuar krejtësisht falas këto operime.
Ndërkaq, humanistja, Albana Krasniqi, në këtë takim foli për fillimin e këtij programi, sfidat dhe sukseset.
Megjithatë, ajo tha se është shumë e lumtur, që sado pak po i ndihmon fëmijët me probleme në zemër, pasi që trajtimi i tyre është shumë i kushtueshëm./KosovaNews/
