Deputetja e Lidhjes Demokratike të Kosovës, Hykmete Bajrami, ka reaguar ashpër ndaj qeverisë së udhëhequr nga Albin Kurti, duke e akuzuar për përfshirje në korrupsion të thellë, keqqeverisje dhe për kapje të institucioneve të sektorit energjetik.
Në një reagim të publikuar në rrjetet sociale, Bajrami e ka quajtur “mafi energjetike” sistemin aktual të menaxhimit të energjisë në Kosovë, duke theksuar se institucione si ZRrE, KOSTT dhe KEK janë të mbushura me familjarë dhe militantë partiakë. Ajo ka ngritur shqetësime për rritjen e varësisë nga importi i energjisë, që sipas saj po përfiton kompanitë ndërmjetëse, përfshirë EFT-në e Vuk Hamoviqit dhe GEN-in, të cilën e lidh me ambasadorin Martin Berishaj.
“Albin Kurti dhe partia e tij janë thellë në këtë rrjet të korrupsionit energjetik. Po mbushin xhepat e tregtarëve të energjisë ndërsa e kanë shkatërruar sektorin privat dhe po dëmtojnë rëndë interesat e qytetarëve,” shkruan Bajrami.
Ajo ka akuzuar gjithashtu kryeministrin për dhënie të mijëra tenderëve njëburimor dhe për procese të prokurimit të dyshimta, përfshirë negociata në grupe private të komunikimit. Po ashtu, Bajrami ka përmendur lidhje të mundshme të Kurtit dhe bashkëpunëtorëve të tij me individë të përfshirë në trafik droge.
Në qendër të kritikës ishte edhe qasja e qeverisë ndaj situatës në veri të vendit. Bajrami vlerëson se retorika patriotike nuk mund të fshehë dështimet konkrete në terren dhe se, sipas saj, kthimi i zyrtarëve serbë në institucionet e Kosovës është çështje kohe.
“Kosova ka humbur pesë vjet kohë nën qeverisjen tënde. Ke sjellë masa ndëshkuese nga BE-ja dhe e ke dëmtuar rëndë përkrahjen e aleatëve tanë më të rëndësishëm,” shkruan Bajrami.
Në përmbyllje të reagimit të saj, deputetja kërkon hetim të thelluar për të gjithë ata që, sipas saj, kanë shkelur Kushtetutën dhe kanë përdorur pushtetin për përfitime personale.
“Nëse institucionet e drejtësisë dhe sigurisë funksionojnë, atëherë duhet të ndalojnë hyrjen në ndërtesën e Qeverisë nga ata që janë në shkelje të Kushtetutës,” përfundon ajo.
