Deputeti nga radhët e LDK-së, Avdullah Hoti edhe sot ka dhënë kritika ndaj Qeverisë së Kosovës, pasi sipas tij janë dyfishuar pagesat avans për investimet kapitale.
Ai thotë se për vitin 2022 pagesat kanë shkuar mbi 88 milionë euro, ndërsa që më parë ishin sa gjysma e kësaj shume.
Për këtë Hoti thotë se qeveritarët aktual nuk kanë lidhje me shtet, ekonomi dhe zhvillim.
“Këta qeveritarë lidhje me shtet nuk kanë, lidhje me ekonomi e me zhvillim nuk kanë. Bazuar në “Raportin e buxhetit për 2022”, Qeveria i ka dyfishuar pagesat avans për investime kapitale. Gjatë vitit 2022 pagesat avans kanë shkuar në 88.1 mil euro. Në vitin 2021 kanë qenë 47.5 mil euro, ndërkaq në vitin 2020 kanë qenë vetëm 20.1 mil euro. Si ka mundësi që investimet kapitale gjatë vitit 2022 dhe 2021 të jenë shumë të ulëta, ndërkaq pagesat avans të dyfishohen secilin vit?!”, ka shkruar Hoti.
Ai shton se Qeveria ka shumë punë për të sqaruar arsyeshmërinë e këtyre pagesave.
“Ky raport i buxhetit ka plot anomali të tjera, të cilat do të bëhen të ditura në ditët në vijim”, tha Hoti.
