Ish-kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati, po qëndron për vizitë në Kosovë.
I shoqëruar nga njësitë speciale të EULEX-it, Gucati ka arritur të dielën në Kosovë për arsye familjare, ka konfirmuar Gjykata Speciale.
Sipas përgjigjes së Speciales për KOHËN, Gucati ka pasur “arsye bindëse humanitare” për t’iu lejuar vizita në Kosovë.
“Kolegji i Apelit ka udhëzuar Zyrën e Regjistrimit që të menaxhojë një vizitë paraburgimi në Kosovë për z. Gucati për të takuar familjen e ngushtë. Z. Gucati mbetet në paraburgim nga Dhomat e Specializuara. EULEX-i dhe Policia e Kosovës po mbështesin Dhomat e Specializuara të Kosovës”, ka thënë zëdhënësja e Gjykatës Speciale, Angela Griep.
Vizitën e fundit në Kosovë, Gucati e ka bërë para më shumë se një muaji, përkatësisht më 12 maj prej kur u arrestua më 25 shtator të vitit 2020.
Gucati bashkë me nënkryetarin e OVL-UÇK-së, Nasim Haradinaj, u dënuan më 18 maj nga Specialja me nga katër vjet e gjysmë burgim, pasi u gjetën fajtorë për disa pika të akuzës.
Ata janë të parët që janë dënuar në shkallë të parë dhe ndër të parët që ishin arrestuar nga kjo gjykatë me seli në Hagë.
