Një person është arrestuar sot në Viti, pasi ai dyshohet se ka shtënë me armë zjarri në një sallë dasmash gjatë një ahengu familjar.
Policia e Kosovës njofton se Drejtoria Rajonale Gjilan, Stacioni Policor Viti me datën 31/07/2022 ka pranuar një informatë se në një sallë dasmash në një aheng familjar (dasmë) ka të shtëna me armë zjarri.
“Patrulla policore me urgjence ka dalë në vendin e ngjarjes, ku gjatë kontrollit ne oborrin e kësaj salle ka gjetur njëmbëdhjetë gëzhoja të armës së zjarrit kalibër 7.65 mm dhe një fishek të kalibrit 7.65 mm”, thuhet në njoftim.
Pas kërkimeve, patrulla policore ka lokalizuar dhe arrestuar të dyshuarin M.M. (1966) nga i cili është konfiskuar arma pistoletë M57 prodhim Jugosllav e kalibrit 7.65 mm, e cila së bashku me provat e tjera do të dorëzohen si dëshmi në Gjykatë.
I dyshuari është intervistuar në bazë të procedurave ligjore.
Në lidhje me rastin është njoftuar Prokurori i Shtetit i cili ka urdhëruar që i dyshuari të lirohet në procedurë të rregullt, ndërsa rasti me kallëzim penal për veprat penale ,,Shkaktim i rrezikut të përgjithshëm’’, ,,Mbajtje në pronësi, kontroll ose posedim të pa autorizuar të armëve’’ dhe ,,Përdorim i armës apo mjetit të rrezikshëm’’, të procedohet së bashku me provat në Prokurorinë Themelore në Gjilan.
Drejtoria Rajonale e Policisë Gjilan vazhdon të apeloj tek të gjithë qytetarëve që të festojnë me zemër, jo me armë. Sa më pak armë, më pak viktima./KosovaNews/
Foto/Arma- pistoleta M57 prodhim Jugosllav që ka konfiskuar Policia e Kosovës:
