Procesi drejt zgjedhjeve të parakohshme parlamentare të 7 qershorit 2026 ka hyrë në një fazë dinamike.
Deputeti i Lëvizjes Vetëvendosje, Mefail Bajqinovci, ka publikuar një video-mesazh ku u bën thirrje bashkëatdhetarëve për një mobilizim sa më të madh, ndërkohë që Komisioni Qendror i Zgjedhjeve (KQZ) ka përcaktuar afatet zyrtare dhe koston e këtij procesi.
Deputeti Bajqinovci u është drejtuar qytetarëve që jetojnë jashtë vendit, duke kërkuar që pavarësisht faktit se zgjedhjet vijnë sërish, angazhimi i diasporës duhet të jetë maksimal.
“Zgjedhjet janë caktuar më 7 qershor dhe çdo votë ka rëndësi. Ju që nuk mund të vini në Kosovë, ju lutem të regjistroheni për votim me postë ose në ambasadat dhe konsullatat tona. Ejani, votoni dhe festojmë së bashku,” deklaroi Bajqinovci në mesazhin e tij.
Ndërkohë, Komisioni Qendror i Zgjedhjeve ka njoftuar se dritarja për regjistrimin e votuesve nga diaspora do të jetë e hapur për 12 ditë.
Sipas njoftimit, ky proces fillon më 6 maj dhe mbyllet më 17 maj 2026.
Ndërkaq sa i përket votimit, janë përcaktuar këto afate:
Votimi me postë: Zhvillohet nga 25 maji deri më 6 qershor 2026.
Votimi në përfaqësi diplomatike: Do të mbahet më 6 qershor, nga ora 07:00 deri në 19:00.
Kujtojmë se mbledhjen e sotme, KQZ ka miratuar planin e buxhetit për organizimin e këtyre zgjedhjeve, i cili kap vlerën e 10,887,186.45 eurove.
