Një veturë është djegur në mbrëmjen e së martës në Leposaviq.
Siç raportojnë mediat lokale, bëhet fjalë për veturën e nënkryetares së Komunës së Leposaviqit, Dragana Miletiq.
Zëvendësdrejtori i Policisë në veri, Veton Elshani, ka thënë se nga zjarri është përfshirë një pjesë e veturës.
Ai ka thënë se kjo nuk mund të lidhet me çështjen e konvertimit të targave ilegale në RKS.
Elshani ka thënë se janë duke u zhvilluar hetimet për rastin.
Nënkryetarja e Komunës së Leposaviqit, Dragana Miletiq, para disa muajsh kishte raportuar në Polici se ishte kërcënuar, derisa kishte kërkuar edhe mbrojtje nga Policia e Kosovës.
Në fillim të qershorit, një person ishte arrestuar nën dyshimin se pati kërcënuar Miletiqin, sipas njoftimit të ministrit të Brendshëm, Xhelal Sveçla.
Dragana Miletiq është zgjedhur nënkryetare e Komunës së Leposaviqit, komunë kjo e cila tash drejtohet nga Lulzim Hetemi.
