Në takimin e mbajtur në Berlin u theksua përparim i rëndësishëm në përpjekjet ndërkombëtare për t’i dhënë fund luftës, me fokus në garancitë e sigurisë për Ukrainën. Megjithatë, liderët theksuan se asnjë marrëveshje nuk do të konsiderohet përfundimtare derisa të dakordohen të gjitha çështjet kyçe.
(The Guardian) – Udhëheqësit evropianë kanë përshëndetur “përparimin e rëndësishëm” në bisedimet për Ukrainën, por theksojnë se “asgjë nuk është e arritur derisa gjithçka të jetë e dakorduar”
Qeveria gjermane ka publikuar një deklaratë në emër të udhëheqësve evropianë që morën pjesë në bisedimet e mbajtura në Berlin, ku është theksuar se është shënuar “përparim i rëndësishëm” në përpjekjet për arritjen e paqes në Ukrainë.
Në deklaratë thuhet se udhëheqësit mirëpresin “përparimin e rëndësishëm” në siç theksohet posaçërisht “përpjekjet e Trumpit për të siguruar një paqe të drejtë dhe të qëndrueshme në Ukrainë”, duke u pajtuar që të punojnë së bashku me presidentin amerikan Donald Trump dhe presidentin ukrainas Volodymyr Zelenskyy “për të arritur një paqe të qëndrueshme që ruan sovranitetin e Ukrainës dhe sigurinë evropiane”.
Ata kanë theksuar se synimi i tyre kryesor është ofrimi i “garancive të fuqishme të sigurisë dhe masave për mbështetjen e rimëkëmbjes ekonomike të Ukrainës”.
Ndër idetë konkrete të përfshira në deklaratë është edhe “mbështetja e vazhdueshme dhe e konsiderueshme për Ukrainën për ndërtimin e forcave të saj të armatosura”, në një nivel paqeje prej 800 mijë ushtarësh, në mënyrë që vendi të jetë “në gjendje të parandalojë konfliktet dhe të mbrojë territorin e vet”.
Deklarata parasheh gjithashtu përfshirjen e “një force shumëkombëshe të udhëhequr nga Evropa në Ukrainë”, e cila do të ndihmonte në “rigjenerimin e forcave ukrainase, sigurimin e hapësirës ajrore të Ukrainës dhe mbështetjen e deteve më të sigurta”, duke operuar “brenda territorit të Ukrainës”, larg vijave të mundshme të frontit.
Udhëheqësit kanë folur edhe për një “mekanizëm të monitorimit dhe verifikimit të armëpushimit të udhëhequr nga SHBA-ja, me pjesëmarrje ndërkombëtare”, i cili do të shërbente për “paralajmërim të hershëm për çdo sulm të mundshëm në të ardhmen” dhe për identifikimin e përgjegjësisë në rast shkeljesh, me synim uljen e tensioneve.
Me rëndësi të veçantë për Ukrainën, deklarata bën thirrje për “një angazhim ligjërisht të detyrueshëm” për “marrjen e masave për rivendosjen e paqes dhe sigurisë në rast të një sulmi të ardhshëm të armatosur”, përmes përdorimit të forcave të armatosura, inteligjencës, logjistikës, masave ekonomike dhe veprimeve diplomatike. Kjo, sipas vëzhguesve, është ajo që Zelenskyy e ka përshkruar si garanci të ngjashme me “Nenin 5”.
Në dokument përfshihet edhe gjuha për “investimin në prosperitetin e ardhshëm të Ukrainës” dhe për mbështetjen e anëtarësimit të saj në Bashkimin Evropian. Një klauzolë thelbësore e deklaratës thekson se “kufijtë ndërkombëtarë nuk duhet të ndryshohen me forcë”, duke përsëritur se çdo vendim për këtë çështje duhet të merret nga populli i Ukrainës dhe vetëm pasi të jenë vendosur “garanci të fuqishme të sigurisë”.
“U pajtuan se disa çështje do të duhet të zgjidhen në fazat përfundimtare të negociatave”, thuhet në dokument.
Udhëheqësit ishin të qartë se, “si në çdo marrëveshje, asgjë nuk është e dakorduar derisa gjithçka të jetë e dakorduar”, dhe se të gjitha palët duhet të punojnë intensivisht drejt një zgjidhjeje që do të siguronte një përfundim të qëndrueshëm të luftimeve.
Në fund, ata i kanë bërë thirrje Rusisë “të tregojë gatishmëri për të punuar drejt një paqeje të qëndrueshme” dhe kanë njoftuar se janë pajtuar “të vazhdojnë rritjen e presionit ndaj Rusisë për ta sjellë atë në tryezën e negociatave sa më shpejt të jetë e mundur”.
