Asamblistët e Komunës së Mitrovicës së Veriut, me propozimin e Aida Ferati-Dolit nga radhët e Lëvizjes Vetëvendosje, kanë miratuar kërkesën për hapjen për qarkullim të urës kryesore mbi lumin Ibër.
Ky propozim, është votuar me “Për” nga 11 asamblistë tjerë, teksa një ishte kundër dhe një abstenim.
Ferati Doli tha se është koha të lejohet qarkullimi i lirë mbi Ibër, teksa hasi në kundërshtime nga i vetmi asamblist serb aty.
Në mbledhjen e Kuvendit Komunal të Mitrovicës së Veriut ishte vetëm një asamblist serb, Dushan Millunoviq, i cili votoi kundër kërkesës për hapjen për qarkullim të urës mbi Ibër.
Ai tha se vendimi është i pamenduar dhe mund të shkaktojë incidente, pasi sipas tij, po synohet “bashkimi i Mitrovicës”.
Mitrovica e Veriut është një nga katër komunat në veri të Kosovës, që banohen me shumicë serbe.
Gjashtëmbëdhjetë asamblistët e kësaj komune u zëvendësuan dhjetorin e vitit të kaluar, pasi asamblistët paraprakë dhanë dorëheqje, si pjesë e largimit kolektiv të serbëve nga institucionet e Kosovës në veri, në shenjë proteste me vendimin e Prishtinës për riregjistrimin e makinave me targa serbe në ato të Kosovës.
Pas luftës së fundit në Kosovë, ura mbi lumin Ibër e ndau Mitrovicën në dy pjesë, në atë jugore me shumicë shqiptare, dhe në pjesë veriore, të banuar me shumicë serbe. Sot, ato janë dy komuna të veçanta.
Ura mbi lumin Ibër apo “rivitalizimi i urës” ka qenë temë e dialogut mes Kosovës dhe Serbisë për normalizimin e raporteve, që ndërmjetësohet nga Bashkimi Evropian. Palët kishin rënë dakord që ura të ishte e hapur për qarkullim. Por, në praktikë kjo nuk ndodhi kurrë dhe vetëm njëra anë u hap për këmbësorët.
