Janusz Bugajski, anëtar i lartë në Fondacionin Jamestown në Washington DC të SHBA-së, ka thënë se mosmarrëveshjet aktuale mes Shqipërisë e Kosovës i shërbejnë kryesisht interesave të presidentit të Serbisë, Aleksandar Vuçiq.
Bugajski në një opinion për “The Geopost” ka treguar tri mënyra pse këto mosmarrëveshje i shërbejnë administratës së Vuçiqit.
Kryeministri i Shqipërisë, Edi Rama, të martën mbrëma në konferencë për media, ka njoftuar për anulimin e mbledhjes së përbashkët mes qeverive të Shqipërisë dhe Kosovës që ishte paraparë të mbahej sot në Gjakovë.
“Mosmarrëveshjet midis Shqipërisë dhe Kosovës dhe ndërmjet liderëve shqiptarë përtej kufijve shtetërorë mund të jenë konstruktive nëse ato çojnë në nisma të reja dhe përfshijnë publikun e të dy vendeve në diskutimet për një të ardhme të përbashkët. Megjithatë, mosmarrëveshja aktuale i shërben kryesisht interesave të administratës së Vuçiqit në tre mënyra. Së pari, mbështetja nga Tirana forcon dorën e Beogradit në dialogun me Prishtinën. Së dyti, zvogëlon pozitën e Kosovës si në Uashington ashtu edhe në Bruksel, ndërkohë që rrit reputacionin e Ramës si zgjidhës i problemeve rajonale. Dhe së treti, ushqen akuzat stereotipike serbe se shqiptarët janë të paaftë për të qeverisur veten dhe kanë nevojë për një mjeshtër rajonal”, ka shkruar Bugajski.
