Ministria e Punëve të Brendshme (MPB) tashmë i ka mbaruar procedurat e përzgjedhjes së 50 personave për pozitat e kërkuara në konkursin e hapur në muajin gusht të këtij viti. KosovaNews ka siguruar listën me emrat e personave që kanë fituar vendet e punës.
MPB hapi konkurs në fillim të muajit gusht për 50 vende të lira në pozitën si ‘Zyrtar administrativ’ ku mes tjerash kërkohej vetëm diploma e shkollës së mesme dhe shkathtësitë kompjuterike në aplikacione të programeve (word, Excel, Power Point).
Në këtë konkurs patën aplikuar 3 mijë e 335 kandidatë dhe të gjithë i janë nënshkruar testimit me shkrim, kurse ata që kanë kaluar këtë fazë i janë nënshkruar edhe testimeve të mëtutjeshme.
Për shkak të numrit të madh të konkurruesve testi është mbajtur në objektin e Fakultetit Juridik dhe Ekonomik, në Universitetin e Prishtinës.
E pas mbarimit të testit me shkrim, tashmë MPB i ka përfunduar gjithë procedurat e rekrutimit dhe ka bërë përzgjedhjet e 50 kandidatëve për vendet e punës.
KosovaNews e ka siguruar listën me emrat e atyre që kanë marrë pikët maksimale dhe janë të përzgjedhur për të nisur punën nëpër Qendrat për Pajisje me Dokumente dhe Qendrat për Regjistrimin e Automjeteve në Komunat Kosovës.
Të njëjtit që kanë fituar pikët maksimale dhe janë përzgjedhur do të pajisen fillimisht me kontratë një- vjeçare, pasi kështu thuhej edhe në hapje konkursit.
Sipas konkursit, përveç që nuk kërkohej përvojë paraprake, disa prej kërkesave të cilat duhet t’i plotësojnë kandidatët është që të kenë njohuri bazike sipas fushës të arsimit përkatës.
Mandej ata duhet të kenë njohuri lidhur me procedurat standarde administrative/teknike në një fushë të caktuar, aftësi për të punuar në kuadër të planeve dhe procedurave të përcaktuara si dhe njohja e njërës prej gjuhëve zyrtare të Republikës së Kosovës (me shkrim dhe me gojë) është e domosdoshme.
Për këtë pozitë paga do të jetë 423.85 Euro bruto./KosovaNews/
