Ministri i Infrastrukturës, Liburn Aliu, ka thënë se vendimi për plotësim-ndryshimin e Ligjit për ndërtime pa leje i miratuar sot në kabinetin qeveritar do t’ia japë mundësinë qytetarëve që t’i legalizojnë ndërtimet.
Aliu në konferencën për media pas mbledhjes së Qeverisë, tha që pronarët që nuk i kanë të legalizuara objektet e tyre duhet të aplikojnë për legalizim, sepse sipas tij, procedura është shumë e thjeshtë.
Ministri i Mjedisit, Planifikimit Hapësinor dhe Infrastrukturës ka thënë se mbi 75% e ndërtimeve në Kosovë janë pa leje, gjë që ndikon në zhvillimin ekonomik dhe planifikimin hapësinor të vendit.
“Në regjistrimet e ndërtimeve pa leje në vend, figurojnë 352 mijë e 836 ndërtime pa leje në të gjithë vendin. Vetëm komuna e Prishtinës i ka mbi 46 mijë ndërtime pa leje. Mbi 3/4 e ndërtimeve janë pa leje. Jemi në përgatitet finale të planit hapësinor të Kosovës. Banimi kolektiv është kryesisht ilegal. Banorët që i kanë ble ato banesa nuk mund ti regjistroj në kadastër”, tha ai.
Aliu pas mbledhjes së Qeverisë së Kosovës ka thënë se aprovimi i projektligjit për trajtimin e ndërtimeve pa leje është i rëndësishëm sepse lidhet me zhvillimin ekonomik dhe planifikimin hapësinor në Kosovë.
“Ky ligj është mundësi e mirë që këto ndërtime të legalizohen. Tek ndërtimet individuale të gjithë pronarët mund të vijnë ta bëjnë legalizimin. Është e rëndësishme që të bëjnë thirrje për pronarët e aseteve që i kanë të palegalizuara të aplikojnë për legalizim. Janë vetëm katër formularë për plotësim”, shtoi ai.
Ministri bëri të ditur se çmimi për legalizim është shumë i ulët.
“Prandaj ky ligj është një mundësi e mirë që të gjitha këto ndërtime të legalizohen, është një shansë e re, çmimi është i ulët 1 euro për 1m2 për ndërtimet individuale, kur flasim për ndërtimet kolektive është 2 euro për m2”, u shpreh ai.
Ai tha se vetëm komuna e Prishtinës i ka mbi 46 mijë ndërtime pa leje.
Sot Qeveria e Kosovës bëri plotësim-ndryshimin e Ligjit për trajtimin e ndërtimeve pa leje.
Në Kosovë është në fuqi ligji i vitit 2018 për trajtimin e ndërtimeve pa leje.
Qëllimi i këtij ligji është krijimi i procedurave të thjeshtëzuara për ta mundësuar legalizimin dhe për të ndihmuar qytetarët që të realizojnë përfitime nga ndërtimet e tyre, ofrimi i shërbimeve përmes një zyreje të vetme shërbyese për legalizim dhe regjistrim të ndërtesave dhe pjesëve të ndërtesave në Kadastër, dhe regjistrimin e pronarit të ndërtimit pa leje dhe pjesëve të ndërtesave në Regjistrin e të Drejtave në Pronë të Paluajtshme si dhe identifikimi i ndërtimeve pa leje në mënyrë që komunave t’u mundësohet planifikimi dhe ofrimi më i mirë i shërbimeve për banorët në territorin e tyre.
Ndërsa i pyetur se pse nuk ka vepruar inspektorati në aksionin e konfiskimit të vilave në Brezovicë, ai ka thënë se ndërtimet janë të natyrave të ndryshme.
“Përpos ndërtimeve janë hidrocentralet, prerja e pyjeve. Kur flasim për Brezovicën ka një dallim esencial mes pjesës se Brezovicës dhe pjesëve tjera”, ka thënë ai.
Gjersa ka shtuar se dualizmi i kompetencave me komunat ka qenë shkaktari kryesor për këtë problem.
