Këshilli i Prindërve të Kosovës ka njoftuar se do të ndërmarrin disa hapa për të kundërshtuar grevën në institucionet arsimore, të cilën e ka quajtur papranueshme dhe e paarsyeshme, pasi për çdo ditë po dëshmohet edhe me çregjistrime të përditshme të nxënësve nga shkollat publike dhe regjistrimin e fëmijëve në shkolla e institucione private.
Kujtojmë se dje SBASHK-u dhe drejtuesi i saj Rrahman Jasharaj kanë injoruar kërkesën për takim urgjent nga Këshilli i Prindërve, duke mos pranuar as të diskutohet që të gjendet një zgjidhje së paku për fëmijët 1 deri 6 vjeç që prindërit po detyrohen t’i dërgojnë në kopshte private dhe të paguajnë para të mëdha nga buxheti familjar, shkruan KosovaNews.
E pasi janë refuzuar në takim nga SBASHK-u, përmes një njoftimi në Facebook, Këshilli i Prindërve i Kosovës njoftoi dje se i ka ende kapacitet shumë të kufizuara të veprimit, andaj ka shtuar se energjitë maksimale vullnetare i kanë vendosur në drejtim të deklarimit publik për mbrojtjen e të drejtave të fëmijëve për kujdesie, edukim e arsimim publik të plotë, të pakufizuar e të dinjitetshëm.
Sipas njoftimit, kjo situatë e përsëritur për të satën herë, në momentin më të rëndë të arsimit në Kosovë, është tërësisht e papranueshme dhe e paarsyeshme, i cili sipas tyre, po dëshmohet edhe me çregjistrime të përditshme të nxënësve nga shkollat publike.
Sipas tyre, më situatën aktuale, kur fëmijët vazhdojnë ta kenë të pamundësuar vijimin e procesit mësimor, kanë këshilluar që secili këshill i prindërve nëpër shkollat e Kosovës, apo edhe prindër të paorganizuar, të fillojnë t’i marrin hapat në vijim:
1. Të kërkohet furnizimi me libra i të gjithë fëmijëve përmes prindërve nga të gjitha shkollat në Kosovë qysh nesër (më 12 shtator).
2. Prindërit të fillojnë takime të rregullta ditore nëpër hapësirat shkollore ose kudo është e mundur, me qëllimin e vetëm marrjen e veprimeve për t’i dalë në ndihmë fëmijëve të tyre.
3. Prindërit të fillojnë të punojnë me fëmijët e tyre përmes platformave digjitale në internet të ofruara nga MASHT, Youtube, eShkollori e të tjera.
4. Prindërit të koordinohen dhe bashkëpunojnë me mësimdhënësit që duan të zhvillojnë mësim në distancë përmes platformave në internet për ta realizuar sa më mirë procesin mësimor.
5. Në shkollat ku është e mundur, ditëve në vijim prindërit t’i çojnë për një orë fëmijët për t’u takuar me shokët e shoqet e klasës.
“Dashurinë dhe mundin tonë të pakushtëzuar ta bashkojmë për fëmijët tanë”, thuhet në njoftim.
