Shqipëria ka shënuar një volum prej 2.2 miliardë euro transferta në kuadër të SEPA-s, ndërsa vetëm gjatë periudhës tetor–dhjetor janë realizuar rreth 166 mijë transferta, sipas të dhënave të Bankës së Shqipërisë.
Ndërkohë, Kosova vazhdon të mbetet jashtë kësaj zone pagesash, mes përplasjeve politike rreth legjislacionit të nevojshëm për anëtarësim.
Ministri i Financave, Hekuran Murati, ka deklaruar se opozita nuk e ka mbështetur trajtimin e Projektligjit për Parandalimin e Pastrimit të Parave, i cili është pjesë e paketës së domosdoshme për integrimin në SEPA.
Ai i është referuar një studimi të “German Economic Team”, sipas të cilit qytetarët dhe bizneset në Kosovë do të mund të kursenin mbi 50 milionë euro në vit nëse vendi bëhet pjesë e SEPA-s.
Sipas Muratit, vendet e tjera të rajonit tashmë kanë bërë përparim në këtë drejtim, duke përfituar nga kosto më të ulëta për transfere bankare dhe lehtësim të transaksioneve ndërkufitare.
