Kryetarja e Kuvendit të Republikës së Kosovës, Albulena Haxhiu, ka bërë të ditur se është pranuar kërkesa e Grupit Parlamentar të Lëvizjes VETËVENDOSJE! për thirrjen e një seance të jashtëzakonshme për zgjedhjen e Presidentit.
Sipas njoftimit zyrtar, seanca do të mbahet sot në orën 20:30, ndërsa në kuadër të kësaj kërkese janë propozuar dy kandidatura për postin e Presidentit: Feride Rushiti dhe Hatixhe Hoxha.
Duke theksuar rëndësinë e pjesëmarrjes së deputetëve, kryetarja e Kuvendit u ka bërë thirrje të gjithë ligjvënësve që të jenë të pranishëm në këtë seancë.
“Sot kam pranuar kërkesën e Grupit Parlamentar të Lëvizjes VETËVENDOSJE! për thirrjen e një seance të jashtëzakonshme për zgjedhjen e Presidentit, e cila do të mbahet sot në orën 20:30. I ftoj që të gjithë deputetët e Kuvendit të Republikës së Kosovës që të marrin pjesë në këtë seancë, në përputhje me obligimet e tyre kushtetuese,” thuhet në deklaratën e saj.
Zhvillimet pritet të jenë vendimtare për zhbllokimin e procesit të zgjedhjes së Presidentit, ndërsa mbetet të shihet nëse do të sigurohet mbështetja e nevojshme parlamentare për njërën nga kandidaturat.
