Boksierja më e mirë e vitit 2025 është shpallur Donjeta Sadiku, ndërsa çmimin për boksierin më të mirë e ka fituar Shpëtim Bajoku.
Federata e Boksit e Kosovës ka shpallur laureatët e çmimeve vjetore për vitin 2025, në një ceremoni solemne të mbajtur në Prishtinë.
Në komunikatën e saj, FBK-ja ka bërë të ditur se, përveç dy çmimeve kryesore, janë vlerësuar edhe trajnerë, gjyqtarë, klube dhe punëtorë sportivë për kontributin e tyre në zhvillimin e boksit.
Trajnerja më e mirë e vitit është shpallur Marjola Sallauka, gjyqtari më i mirë për kontribut ndërkombëtar Latif Demolli, ndërsa për kontribut vendor Granit Qorri. Çmimi për punëtorin më të dalluar i ka takuar Halil Kurhaskut, ndërsa klubi më aktiv i vitit është shpallur K.B. “Gjakova 137” nga Gjakova.
Gjithashtu Federata ka njoftuar se janë ndarë mirënjohje për boksierët më të dalluar në kategoritë Seniorë, U18, U16 dhe U14, si dhe për boksieret më të mira të vitit, duke theksuar rëndësinë e brezave të rinj. Në kategorinë “Shpresa e Boksit” janë vlerësuar sportistë premtues, ndërsa me respekt të veçantë janë nderuar Nazif Gashi dhe Shkelzen Riza (post mortum) për kontributin e tyre në sportin e boksit.
Kryetari i FBK-së, Enver Krasniqi, e ka falënderuar Ministrinë e Kulturës, Rinisë dhe Sportit, Komitetin Olimpik të Kosovës, partnerët dhe mediat për mbështetjen e vazhdueshme, duke theksuar se me këtë ceremoni janë përmbyllur aktivitetet zyrtare për vitin 2025 dhe se synimet mbeten të larta edhe për vitin 2026.
