Kryetari i LDK-së, Lumir Abdixhiku, ka reaguar pas ndryshimit në rezultatet e kandidatëve për deputet. Sipas tij, kjo nuk është rastësi por rezistencë e atyre që siç thotë – e kanë gërryer LDK-në nga brenda.
Abdixhiku po ashtu ka deklaruar se do të ketë pasoja, por që për to duhet pritur pas Kuvendit.
“Kjo që po ndodh në disa qytete, nuk është rastësi. Është rezistencë e atyre që e kanë gërryer shtëpinë tonë nga brenda dhe sot duan ta ndalin reformën që nuk e durojnë dot. Sulmi ndaj emrave të rinj e të pastër është sulm ndaj punës tonë pesë vjeçare dhe ndaj vullnetit të mbështetësve që është shprehur qartë me votë të lirë. Prandaj, pasoja do të ketë. Për to, na prisni pas Kuvendit. Përtej turpit publik dhe ligjit të Republikës, do të ketë edhe përgjegjësi politike brenda shtëpisë sonë”, ka thënë Abdixhiku në Facebook.
Kryetari i LDK-së ka kërkuar nga institucionet e drejtësisë që pa vonesa e përjashtime të veprojnë.
“Përgjegjësi sipas ligjit, burg, për këdo që ka cenuar votën e lirë. Komisionerët manipulues kanë emra. Dihen të gjithë. Jepuni atyre dhe porositësve përgjigjen pa hezitim. Dhe për të hequr çdo dyshim, KQZ duhet të sigurojë rinumërim të plotë të çdo kutie në çdo qytet. Le të inkurajohen ata që kanë vlerësuar mirë, të zbulohen ata që kanë vjedhë. Vota nuk tjetërsohet. Vota mbrohet”, ka përfunduar Abdixhiku.
