Ministria në detyrë e Arsimit, Shkencës, Teknologjisë dhe Inovacionit ka publikuar lajmin për ndarjen e bursave për studentët e doktoratës që studiojnë në 500 universitetet më të mira në botë, sipas renditjes prestigjioze Shanghai Ranking.
Gjithsej 53 doktorantë do të përfitojnë mbështetje financiare prej 8,500 euro, si pjesë e programit të mbështetjes së të rinjve në fushën e kërkimit shkencor dhe studimeve të avancuara.
Në një posti në profilin e saj në Facebook, Nagavci është shprehur se ky investim është një hap i rëndësishëm drejt forcimit të kapaciteteve akademike të vendit.
“Këta 53 studentë të jashtëzakonshëm do të marrin mbështetje financiare prej 8,500 euro – një investim i rëndësishëm në dijen dhe të ardhmen e vendit tonë. Besojmë se secili prej tyre do të kthehet me njohuri, përvojë dhe vizion të ri, për t’i shërbyer vendit dhe për të ndërtuar një të ardhme më të ndritur për të gjithë. Suksese!”, ka thënë Nagavci.
