Asamblisti i ri-zgjedhur i Lëvizjes Vetëvendosje në Prizren, Selman Sokoli, ka akuzuar Zyrën e kryetarit të Komunës së Prizrenit, Shaqir Totaj, për mosdhënie të qasjes në dokumentet publike që lidhen me shpenzimet e kabinetit komunal, shkruan KosovaNews.
Në një postim në Facebook, Sokoli ka thënë se prej muajsh kërkesat për qasje në dokumente nuk janë përmbushur, ndërsa sipas burimeve nga Drejtoria e Financave, Totaj dhe stafi i tij kanë realizuar “shpenzime enorme” në dreka, darka dhe udhëtime jashtë vendit.
“Zyra e Totajt ka muaj që nuk na jep qasje në dokumentet publike që tregojnë sa ka shpenzuar Totaj si kryetar dhe stafi i tij. Sipas burimeve nga Drejtoria e Financave, arsyeja për këtë është se Totaj ka shpenzime enorme – ndoshta më shumë se një lider shtetëror – në dreka, darka dhe bileta udhëtimi jashtë vendit”, ka shkruar ai.
Sipas Sokolit, Lëvizja Vetëvendosje ka paraqitur kërkesë për qasje në këto të dhëna edhe përmes Agjencisë për Informim dhe Privatësi, dhe pritet që pas marrjes së dokumenteve të bëhen publike detajet e shpenzimeve të kryetarit Totaj.
