Presidentja e Kosovës Vjosa Osmani ka thënë se nëse nuk ka marrëveshje për qeveri të re, ajo do t’i ftojë të gjitha partitë për konsultime, nëse ndonjëra mund të krijojë shumicën. Ajo ka theksuar se është herët të flitet për zgjedhje të parakohshme.
“Rrjedhat politike në Kosovë janë të paparashikueshme mund të ketë marrëveshje në orët e fundit dhe këtë unë nuk mund ta parashikojë. Në qoftëse s’ka marrëveshje atëherë si presidente e vendit do t’i ftojë të gjitha partitë politike për të parë në qoftëse ka mundësi që dikush ta krijojë shumicën, po ashtu mendoj se është herët të flasim për zgjedhje të parakohshme, por është alternativë nëse nuk krijohet shumica. Në fakt mbetet e vetmja alternativë sipas Kushtetutës”, ka deklaruar Osmani në një intervistë për Deutsche Welle.
Duke folur për tendencat destabilizuese të Serbisë, Osmani ka thënë se Serbia ka pasur tentativë për destabilizim edhe këtë pranverë, por falë ndihmës së aleatëve, këto plane janë parandaluar.
Ka pasur tendenca destabilizimi edhe sivjet në pranverë. Me ndihmën e aleatëve tanë i kemi parandaluar. Ka shumë që nuk duan të tregojnë publikisht se çfarë ka ngjarë. Unë i kam lexuar raportet e institucioneve tona, e di çfarë ka synuar Serbia. Këto janë çështje që janë të rregulluara me ligj. Kur informacionet janë të klasifikuara, e kemi për detyrë. Unë si presidente kam të drejtë të deklasifikojë informacione, mirëpo mendoj që nuk është e drejtë që t’ua vështirësojë punën institucioneve tona të sigurisë. Ata duhet të vazhdojnë të mbledhin informata, dhe të jenë të gatshëm që të na informojnë neve si institucione dhe aleatët në mënyrë që të parandalojmë çdo tendencë destabilizuese të Serbisë”, ka deklaruar Presidentja për DW.
Osmani ka theksuar se Serbia vazhdon të jetë shtet agresor dhe vazhdon të jetë dorë e zgjatur e Putinit, sepse, siç u shpreh ajo, është qëllim i Rusisë që të destabilizohet Ballkani, si mjet destabilizimi për tërë kontinentin evropian.
“Qëllim i Rusisë ka qenë historikisht, që të destabilizohet Ballkani Perëndimor, si mjet destabilizimi për tërë kontinentin evropian. Nuk është që veç po i themi, por ato kanë ndodhur si në vitin 2023 ashtu edhe në nëntor të vitit 2024, ku pati sulm në Ibër-Lepenc dhe qëllimi ka qenë shkatërrimi i mjeteve jetike përmes së cilave Kosova furnizohet me ujë, energji elektrike e ngrohje”, ka shtuar ajo.
Tutje, e pyetur se cilat janë planet e saj pas muajit prill, kur i përfundon mandati i kreut të shtetit, Osmani ka thënë se “nuk mendon se ku do të jetë Vjosa Osmani, por ku do të mbetet Republika e Kosovës”.
“Nëse populli dëshiron që unë akoma të jap kontribut për republikën tonë, atëherë unë do ta jap atë kontribut. Më rëndësi është që unë do të jem në Republikën e Kosovës, duke dhënë qoftë kontribut profesional, qoftë politik”, ka theksuar Osmani.
