Washington, 26 shtator 2025 – Pentagoni i Shteteve të Bashkuara u ka kërkuar kompanive të mbrojtjes që të dyfishojnë ose katërfishojnë prodhimin e armëve më të rëndësishme, për shkak të shqetësimeve për mungesë të rezervave ushtarake në rast të një konflikti të mundshëm me Kinën, raporton Reuters, transmeton KosovaNews.
Sipas raportit të Wall Street Journal, bëhet fjalë për 12 sisteme armësh kritike, të cilat konsiderohen jetike për aftësinë mbrojtëse amerikane, përfshirë raketa, dronë dhe pajisje të avancuara artilerie. Burime pranë Departamentit të Mbrojtjes thanë se prioritet po u jepet prodhuesve që mund të rrisin kapacitetet në një periudhë të shkurtër kohe.
Pentagoni nuk ka dhënë ende koment zyrtar, ndërsa raporti nuk është verifikuar nga Reuters.
Megjithatë, kërkesa për rritje të prodhimit vjen në një kohë kur tensionet SHBA–Kinë po rriten rreth Tajvanit dhe ndikimit kinez në Indo-Paqësor.
Zyrtarë amerikanë kanë paralajmëruar më herët se rezervat e municioneve janë ulur ndjeshëm pas ndihmës së madhe ushtarake të dërguar në Ukrainë dhe Izrael, gjë që ka rritur shqetësimet për aftësinë e SHBA-ve për t’u përballur me një konflikt të dytë madhor.
Kjo lëvizje e Pentagonit shihet si përgatitje për një skenar më agresiv në Azinë Lindore, ndërsa ekspertët paralajmërojnë se garat e reja të armatimit midis superfuqive po hyjnë në një fazë të re, më të rrezikshme se në Luftën e Ftohtë./KosovaNews/
