Burimi: CNN
Përkthimi : Alban Begolli / KosovaNews
Administrata e presidentit amerikan Donald Trump ka paraqitur një plan paqeje me 21 pika për Gazën, që parashikon lirimin e të gjithë pengjeve të mbajtura nga Hamasi brenda 48 orëve nga arritja e marrëveshjes dhe përcakton një rrugë për qeverisjen e Gazës pas përfundimit të luftës, raportoi CNN duke cituar burime nga Uashingtoni, transmeton KosovaNews.
Trump ka shprehur optimizëm se konflikti po i afrohet fundit, duke thënë të premten se palët janë “shumë afër një marrëveshjeje”, vetëm pak ditë pasi i dërguari i tij special deklaroi se “një përparim i madh është i mundur”.
Por kryeministri izraelit Benjamin Netanyahu përsëriti të premten se do të vazhdojë luftën “deri në shkatërrimin e plotë të Hamasit”.
Sipas burimeve të CNN, plani parashikon shkëmbimin e pengjeve me një tërheqje graduale të ushtrisë izraelite nga Gaza dhe ndalon Hamasin të ketë ndonjë rol në administratën e ardhshme të territorit.
Në vend të kësaj, Gaza do të qeveriset përkohësisht nga dy struktura: një organ ndërkombëtar dhe një komitet palestinez, deri në stabilizimin e situatës.
Në propozim nuk jepet një afat për kalimin e administrimit tek Autoriteti Palestinez, ndërsa theksohet se nuk do të ketë zhvendosje të detyruar të popullsisë së Gazës.
Megjithatë, plani nuk e shpall krijimin e një shteti palestinez, por e njeh këtë si aspiratë të palestinezëve. Kjo pritet të shkaktojë tensione brenda koalicionit të krahut të djathtë të Netanyahut, që e kundërshton ashpër çdo formë të shtetësisë palestineze.
Në të njëjtin dokument, administrata amerikane thekson se Izraeli nuk do të sulmojë më Katarin, pas raportimeve se muajin e kaluar kishte goditur me raketa udhëheqës të Hamasit në Doha.
Trump zhvilloi këtë javë një takim me liderë të disa vendeve myslimane, mes tyre Katarin, Arabinë Saudite, Egjiptin, Indonezinë, Turqinë dhe Pakistanin, në kuadër të Asamblesë së Përgjithshme të OKB-së, duke e cilësuar atë si “mbledhjen më të rëndësishme të ditës”.
I dërguari amerikan Steve Witkoff konfirmoi se plani u prezantua para shteteve arabe në OKB, duke shtuar se SHBA “është e bindur se ditët në vijim mund të sjellin një përparim historik”.
Lidhur me këtë, Trump në një postim në rrjetet sociale shkroi:
“Bisedimet kanë qenë të frytshme dhe të frymëzuara. Po punojmë pa pushim për të arritur një marrëveshje të plotë dhe të qëndrueshme. Qëllimi është i qartë: kthimi i pengjeve dhe paqe e përhershme në rajon.”
Megjithatë, ende nuk është e qartë nëse Hamasi është njohur me propozimin, pasi burime në Doha thanë se grupi nuk ka marrë ndonjë ofertë të re për armëpushim. Netanyahu pritet të takohet me Trump në Shtëpinë e Bardhë të hënën.
Në Izrael, plani ka shkaktuar përçarje politike. Ministrat e ekstremit të djathtë Itamar Ben Gvir dhe Bezalel Smotrich e kanë kundërshtuar ashpër, duke paralajmëruar rrëzimin e qeverisë nëse lufta përfundon pa “fitoren e plotë mbi Hamasin”.
Në të kundërt, lideri i opozitës Yair Lapid ka deklaruar se është i gatshëm të mbështesë marrëveshjen për lirimin e pengjeve dhe përfundimin e luftës:
“Ka shumicë për këtë në Knesset dhe në popull. Nuk duhet t’i trembemi kërcënimeve boshe të ekstremistëve,” – shkroi ai në platformën X.
Ndërkohë, operacionet ushtarake izraelite në Gazë vazhdojnë. Ushtria izraelite ka njoftuar se mbi 700 mijë palestinezë janë zhvendosur nga qyteti i Gazës, ndërsa tre divizione izraelite kanë marrë kontrollin mbi pjesën më të madhe të zonës urbane.
