Zëvendëskryeministrja dhe ministrja në detyrë e Punëve të Jashtme dhe Diasporës, Donika Gërvalla, mori pjesë në takimin e Grupit të Miqve të Ballkanit Perëndimor në Nju Jork, organizuar nga zëvendëskryeministri dhe ministri i Punëve të Jashtme të Italisë, Antonio Tajani.
MPJD njofton se duke vlerësuar rëndësinë e këtij takimi, Ministrja Gërvalla ka theksuar se mes miqsh angazhimi matet me rezultate konkrete, bashkëpunim të sinqertë, vlera të përbashkëta demokratike dhe vizion të qartë evropian.
Në njoftim po ashtu thuhet se ajo ka nënvizuar përkushtimin e Republikës së Kosovës për reforma të thella dhe progres të prekshëm, duke theksuar: “Në këtë frymë, Republika e Kosovës dëshmon përkushtimin e saj për reforma, sundim të ligjit, bashkëpunim praktik që sjell rezultate të prekshme për gjithë qytetarët, si dhe shtyhen përpara bashkërendimin në siguri dhe stabilitet afatgjatë për rajonin.”
Sipas MPJD-së në takimin e Miqve të Ballkanit Perëndimor është theksuar se stabiliteti rajonal kërkon rezultate të matshme, koordinim të politikave të sigurisë, forcim të qëndrueshmërisë institucionale dhe përshpejtim të procesit të integrimit evropian.
