Oficerët doganorë kanë zbuluar një sasi të stolive të argjendit të padeklaruara gjatë kontrollit doganor te një pasagjer në Aeroportin Ndërkombëtar të Prishtinës “Adem Jashari”, më 19.09.2025.
Pas verifikimit, ka rezultuar se sasia e stolive ishte 1.518,89 gram me një vlerë të faturuar prej 2.457,58 euro. Sipas njoftimit, fatura e sotlive është prezantuar nga vetë pasagjeri vetëm pas zbulimit të rastit, ndërsa shmangia doganore ishte në vlerë prej 732,40 euro. “Malli është ndaluar dhe i nënshtrohet procedurave të mëtejshme në përputhje me dispozitat e Kodit Doganor dhe Akcizës. Kundër personit në fjalë është iniciuar procedurë për kundërvajtje doganore, ndërsa mallrat do të mbeten nën mbikëqyrje doganore deri në përfundimin e të gjitha procedurave ligjore të parashikuara me legjislacionin në fuqi” – thuhet në njoftimin e Doganës së Kosovës.
Fillimisht, pasagjeri kishte kaluar nëpër kanalin e gjelbër, të destinuar për udhëtarët pa mallra për deklarim, por u përzgjodh për kontroll më të detajuar nga oficerët doganorë.Dogana e Kosovës ka theksuar se vazhdon të jetë e përkushtuar në zbatimin e ligjit, në parandalimin e kontrabandës dhe në ndalimin e çdo përpjekjeje për shmangien e detyrimeve doganore. Ata kanë apeluar tek të gjithë qytetarët dhe udhëtarët që të respektojnë detyrimet ligjore lidhur me deklarimin e mallrave gjatë hyrjes në territorin e Kosovës.
