Politikani me përvojë 30-vjeçare, Naser Arifi, ka zyrtarizuar kandidaturën e tij për asambleist në Komunën e Gjilanit, si bartës i listës së Partisë Guxo për zgjedhjet lokale që po afrohen.
Në një postim në profilin e tij në Facebook, Arifi theksoi përkushtimin e tij të pandryshuar ndaj interesit të përgjithshëm, duke premtuar një angazhim të sinqertë dhe të qëndrueshëm në shërbim të qytetarëve të Gjilanit.
“Qytetarë të Gjilanit, kam nderin të jem bartës i listës për asambleistë të partisë Guxo në Gjilan. Interesi i përgjithshëm, siç ka qenë gjithmonë në aktivitetin tim politik 30-vjeçar, do të jetë edhe këtë herë,” shkroi Arifi.
Ai përmbylli deklaratën e tij me një mesazh besimi dhe shprese:
“Zoti na ndihmoftë, na ruajt nga e ndaluara dhe na dhëntë forcë për punë të hajrit. Zoti e bekoftë vendin tonë.”
Kjo kandidaturë shënon një tjetër kapitull në karrierën politike të Arifit, i cili ka qenë aktiv në skenën publike të Gjilanit për dekada me radhë. Me këtë hap, partia Guxo synon të forcojë praninë e saj në pushtetin lokal dhe të ofrojë alternativa të reja për qeverisjen komunale.
