Kryeministri i Shqipërisë, Edi Rama mori pjesë të enjten në “Konferencën e Rimëkëmbjes së Ukrainës 2025” në Romë, një forum kyç ky ndërkombëtar dedikuar mbështetjes dhe rindërtimit të Ukrainës pas pasojave shkatërruese të luftës. Në mbërritje, Kryeministri Rama u prit nga homologja italiane, Giorgia Meloni.
Ky samit i rëndësishëm, i mbështetur nga liderë botërorë, përfaqësues të lartë të Bashkimit Evropian, G7-ës, organizatave ndërkombëtare, institucioneve financiare dhe sektorit privat, synon të koordinojë ndihmën konkrete dhe investimet strategjike në sektorët kyç të Ukrainës.
Në fjalën e tij, kryeministri Rama theksoi angazhimin e palëkundur të Shqipërisë për të mbështetur Ukrainën në këtë periudhë sfiduese dhe për të kontribuar në procesin e rindërtimit të vendit.
Ai e nisi fjalimin e tij me një notë shaka, duke iu referuar fjalëve të kryeministres italiane, Giorgia Meloni se “të gjitha rrugët të çojnë në Romë” dhe duke komplimentuar Italinë për mikpritjen.
Rama vuri në dukje se megjithëse Shqipëria është një vend i vogël me burime modeste dhe nuk ka fuqi për të ndryshuar rrjedhën e fushëbetejës, ajo do të qëndrojë krah për krah me Italinë dhe partnerët evropianë, duke ofruar mbështetje kudo dhe kurdo që Ukraina të ketë nevojë.
Duke iu përmbajtur premtimit për një fjalim të shkurtër, Kryeministri theksoi se shumëçka ishte thënë dhe do të thuhej nga folësit e tjerë, por dëshironte të ndante një mesazh thelbësor:
“Megjithatë dua të ndaj me ju në këtë qytet që jo shumë kohë më parë i dha lamtumirën një njeriu të madh paqeje, që quhej Papa Françesku, që ndërkohë që mbështesim Ukrainën të luftojë e po kështu të rindërtohet, ne duhet të bëjmë maksimumin që të mos e lëmë paqen në rreshtin e dytë të mendimeve tona.”
Ai paralajmëroi kundër ndarjeve brenda shoqërive demokratike për çështjen e paqes dhe theksoi se Komuniteti Evropian nuk është “luftënxitës”.
Rama u shpreh qartë se Ukraina nuk është agresorja dhe se askush jashtë kufijve të Evropës demokratike nuk duhet t’i japë leksione mbi paqen apo luftën. Ai pranoi se nuk ka një formulë magjike për paqen dhe se “të flasësh për paqen nuk e ndal luftën, e as nuk e bën Vladimir Putinin një paqedashës.”
Në përfundim, kryeministri Rama shprehu bindjen se ndërsa Evropa po bën gjithçka që është e nevojshme për të mbështetur Ukrainën, ajo nuk do të jetë mjaftueshëm e fortë për t’i dhënë fund luftës pa një plan të fuqishëm, kurajoz dhe tërheqës për paqen.
“Paqja është e vetmja e ardhme për të cilën mund të flasë Evropa,” përfundoi Rama, duke cituar fjalët e ndjerë të Papa Françeskut në Romë, “ndjej praninë jo të së shkuarës, por të së ardhmes.”
