Përktheu për KosovaNews, Alban Begolli
Presidenti amerikan Donald Trump është pranë marrjes së një vendimi për të ndërmarrë sulme ushtarake ndaj Iranit, ndërsa shqyrton mundësinë e bashkimit me operacionet ushtarake të Izraelit që synojnë objektivat bërthamore të Teheranit, raporton CNN, transmeton KosovaNews.
Diskutimet në Shtëpinë e Bardhë janë përqendruar tek mënyrat për të ndërmarrë një sulm të shpejtë dhe të saktë – përfshirë edhe përdorimin e bombave që depërtojnë në bunkerë nëntokësorë – pa e zhytur SHBA-në në një luftë të gjithanshme.
Trump po përpiqet të shmangë përshkallëzimin e mëtejshëm të konfliktit që nisi javën e kaluar. Ndonëse kryeministri izraelit Benjamin Netanyahu e ka shtyrë Trump-in drejt veprimit me argumentin se vetëm SHBA mund t’i japë fund ambicieve bërthamore të Iranit, presidenti amerikan mbetet i kujdesshëm ndaj përfshirjes në një tjetër aventurë të gjatë ushtarake jashtë vendit.
Lexo po ashtu:
Burime diplomatike nga Evropa thanë se aleatët amerikanë janë informuar se administrata Trump do të presë për të parë se çfarë do të arrijë Izraeli në javën e parë të operacionit, përpara se të marrë një vendim për përfshirje aktive.
Në një deklaratë për shtyp, Trump tha:
“Më pëlqen të marr vendimin final vetëm një sekondë para afatit. Me luftën gjërat ndryshojnë papritur – nga një ekstrem në tjetrin.”
Ndërsa e shqyrton mundësinë e ndërhyrjes, Trump thekson se një goditje e SHBA-së nuk do të thotë domosdoshmërisht përfshirje e plotë në luftë.
Ndërkaq, një nga këshilltarët e tij më të afërt, David Friedman – ish-ambasador në Izrael – përmes një postimi në rrjetet sociale deklaroi se:
“Amerika mund të hedhë disa bomba MOAB mbi Fordow, të shkatërrojë objektivin bërthamor dhe të largohet.”
Megjithatë, disa aleatë të SHBA-së janë shprehur kundër përfshirjes ushtarake direkte, duke paralajmëruar për pasoja si mbyllja e ngushticës së Hormuzit – që do të ndikonte rëndë tregun global të naftës – si dhe rrezikun që Irani të përshpejtojë programin bërthamor pas çdo sulmi amerikan.
Zëvendësministri i Jashtëm iranian, Majid Takht-Ravanchi, paralajmëroi se çdo ndërhyrje ushtarake amerikane do të sillte përgjigje të ashpër nga Irani:
“Nëse SHBA vendos të ndërhyjë ushtarakisht, ne nuk do të kemi zgjidhje tjetër veçse të përgjigjemi kudo ku gjejmë objektiva të përshtatshëm. Është e qartë – është vetëmbrojtje.”
Një model që disa nga bashkëpunëtorët e Trump-it po e propozojnë është vendimi i tij i vitit 2020 për të vrarë komandantin iranian Qasem Soleimani pranë aeroportit të Bagdadit – një veprim që shkaktoi tensione, por nuk solli luftë të hapur.
