Qeveria e Kosovës ka konfirmuar gatishmërinë për të pranuar përkohësisht deri në 50 emigrantë të dëbuar nga Shtetet e Bashkuara të Amerikës, në kuadër të një marrëveshjeje bashkëpunimi me SHBA-në
Këtë për KosovaNews e ka konfirmuar zëdhënësi i Qeverisë, Përparim Kryeziu, i cili tha se pranimi do të bëhet në përputhje me kushte të caktuara dhe për një periudhë njëvjeçare, me qëllim të lehtësimit të kthimit të këtyre personave në vendet e tyre të origjinës.
“Në përgjigje të kërkesës nga Shtetet e Bashkuara të Amerikës lidhur me pranimin dhe zhvendosjen e përkohshme të shtetasve të vendeve të treta, ne kemi shprehur gatishmërinë tonë për të bashkëpunuar… në përputhje me kushtet e përcaktuara,” deklaroi Kryeziu.
Ai sqaroi se Qeveria e Kosovës do të ketë mundësinë të përzgjedhë individë nga një listë e propozuar, për aq sa ata i plotësojnë kriteret lidhur me sundimin e ligjit dhe sigurinë publike.
“Më shumë informacione do të mund të japim ndërkohë,” tha Kryeziu.
Në një përgjigje për KosovaNews, Kryeziu , e cilësoi SHBA-në si “aleat të palëkundur” të Kosovës dhe theksoi rëndësinë e bashkëpunimit në procesin e integrimit euroatlantik.
