Parlamenti shqiptar ratifikoi të enjten gjatë seancës plenare, marrëveshjen e bashkëpunimit mbi sigurinë dhe mbështetjen afatgjatë ndërmjet Shqipërisë dhe Ukrainës, e cila u nënshkrua më 21 janar 2025 në Davos. Ky akt konfirmon angazhimin e Shqipërisë për të mbështetur Ukrainën përballë agresionit rus.
Gjatë prezantimit të marrëveshjes në seancën plenare, ministri i Jashtëm, Igli Hasani theksoi se Shqipëria e ka treguar qartë qëndrimin e saj që prej fillimit të agresionit të paprovokuar rus.
“Shqipëria ka qëndruar qartë se është në anën e ligjit, të drejtës ndërkombëtare dhe të popullit ukrainas,” u shpreh ai.
Marrëveshja synon që, në përputhje me kapacitetet e saj, Republika e Shqipërisë të ofrojë mbështetje politike, ushtarake, teknike, mbrojtëse dhe humanitare për Ukrainën, si pjesë e angazhimeve dypalëshe dhe ndërkombëtare.
Ministri Hasani shtoi se si një anëtar i besueshëm i NATO-s, Shqipëria merr përgjegjësitë e nevojshme në mbrojtje të rendit ndërkombëtar që garanton paqen dhe lirinë.
“Si vend anëtar i besueshëm i NATO-s, marrim përgjegjësitë e nevojshme në mbrojtje të rendit ndërkombëtar që garanton paqen dhe lirinë për të gjithë,” theksoi ai.
Përmes kësaj marrëveshjeje, Shqipëria angazhohet në katër fusha kryesore:
Siguri dhe Mbrojtje
Llogaridhënie dhe Drejtësi Ndërkombëtare
Ndihmë Humanitare dhe Rindërtim
Reagim në rast përshkallëzimi, për të garantuar përgatitje dhe bashkëpunim në çdo skenar.
Ratifikimi i kësaj marrëveshjeje rikonfirmon solidaritetin e Shqipërisë me Ukrainën dhe angazhimin e saj ndaj parimeve të së drejtës ndërkombëtare dhe sigurisë kolektive.
