Kryeministri në detyrë i Kosovës, Albin Kurti, i ka dërguar një letër kryetarit të Lidhjes Demokratike të Kosovës (LDK), Lumir Abdixhiku, duke i ofruar një koalicion qeverisës.
Në letër, Kurti shprehet i interesuar për një marrëveshje politike me LDK-në, duke theksuar se “jam i bindur që votuesit e LDK-së sot e preferojnë më së shumti koalicionin me LVV”. Ai argumenton se edhe votuesit e LVV e preferojnë po ashtu më së shumti koalicionin me LDK, duke pyetur “Pse të mos e bëjmë?”.
Kurti thekson se Lëvizja Vetëvendosje (LVV) nuk është e interesuar për koalicion me Partinë Demokratike të Kosovës (PDK), dhe se zgjedhjet e reja mund të mos sjellin ndryshime të mëdha për LDK-në, duke e bërë të pashmangshëm një koalicion LVV-LDK. Ai pyet: “Pse ta bëjmë atëherë më vonë, kur mund ta bëjmë tash? Pse edhe një palë zgjedhje për koalicionin e njëjtë?”.
Kryeministri në detyrë fton Abdixhikun për një takim, duke theksuar se “më së miri do të ishte të takohemi e t’i flasim dhe diskutojmë këto si politikanë të pjekur që kanë ardhmërinë e shtetit dhe përparimin shoqëror prioritet mbi çdo tjetër”.
Në letër, Kurti kujton se LDK ka qenë pjesë e koalicioneve qeverisëse me parti të ndryshme në të kaluarën, përfshirë PDK-në dhe Aleancën për Ardhmërinë e Kosovës (AAK), dhe se në vitin 2020 kanë qenë kolegë në Qeverinë Kurti 1.
Ai shprehet se gjatë asaj periudhe nuk ka pasur probleme me Abdixhikun, por me disa të tjerë brenda LDK-së që nuk kanë më pozita të larta dhe as ndikim të madh në parti.
Letra mban datën 05/05/2025 dhe është dërguar nga selia e Lëvizjes Vetëvendosje në Prishtinë.
Letra e Plotë:
