Në mungesë të dy mbrojtësve të të akuzuarit Ekrem Bajroviq, avokatëve Lubomir Pantoviq dhe Millosh Delaviq, ka dështuar të mbahet seanca në Gjykatën e Apelit të mërkurën në rastin ku Bajroviq akuzohet për krime lufte në Istog.
Kryetarja e kolegjit, Afërdita Bytyqi bëri të ditur se nuk kanë prova nëse avokatët janë njoftuar për seancën e sotme, raporton “Betimi për Drejtësi”.
Andaj, në mungesë të kushteve është shtyrë kjo seancë.
Ndryshe, Gjykata Themelore në Prishtinë, me 19 korrik 2024 të akuzuarin Ekrem Bajroviq e ka dënuar me 12 vjet burgim për krime lufte gjatë vitit 1998-1999 në Komuën e Istogut dhe fshatrat përreth.
Sipas aktakuzës së Prokurorisë Speciale të Republikës së Kosovës, të ngritur më 15 shtator 2023, Ekrem Bajroviq po akuzohet se gjatë viteve 1998-1999 ka kryer krime lufte kundër popullsisë civile, në Komunën e Istogut dhe fshatrat përreth, përcjell BetimipërDrejtësi
Bajroviq akuzohet se si pjesëtar i forcave policore dhe ushtarake serbe, individualisht dhe në bashkëkryerje me persona të tjerë, ka marrë pjesë dhe ka kontribuar në aplikimin e masave represive të vrasjes, bastisjes, rrahjes, maltretimit, arrestimit, torturë, trajtimit në mënyrë mizore dhe çnjerëzore, mbajtjes në kushte skllavërie, dëbimit dhe deportimit të popullsisë civile, plaçkitjes, djegies dhe shkatërrimit të shtëpive të popullsisë civile të nacionalitetit shqiptar.
