Ministri i Punëve të Brendshme, Xhelal Sveçla ka vizituar sot pikën kufitare në Bërnjak dhe në stacionin policor të policisë kufitare, me ç’rast i ka takuar disa nga zyrtarët policor të cilët janë ballafaquar me sulme të shumta nga strukturat ilegale serbe në mbrëmjen e 31 korrikut.
Ditë më parë, në veri të Kosovës ka pasur tensione për shkak të vendimeve të Qeverisë së Kosovës për zbatim të vendimeve për targat e makinave – me emra të qyteteve të Kosovës – që lëshojnë autoritetet e Serbisë, si dhe dokumentet serbe.
Si pasojë e situatës së tensionuar, Qeveria e Kosovës pas kërkesës dhe në koordinim me ShBA, e ka shtyrë zbatimin e vendimeve për 1 shtator, me kusht që serbët lokalë të heqin barrikadat. Barrikadat janë hequr deri në pasditen e 1 gushtit.
E sot në ditë vikendi, ministri i Punëve të Brendshme, Xhelal Sveçla ka vizituar pikën kufitare në Bërnjak dhe në stacionin policor të policisë kufitare.
“Siç kemi njoftuar, zyrtarët e kësaj pike kufitare janë sulmuar përsëri dje derisa po patrullonin në liqenin e Ujmanit. Që nga viti i kaluar deri më tash në veri të vendit kanë ndodhur 14 sulme, 10 prej të cilave kanë qenë ndaj zyrtarëve policor. Përkundër të gjitha sfidave me të cilat po ballafaqohemi tek të gjithë zyrtarët policor pashë një vendosmëri dhe entuziazëm që në plotni të përmbushin detyrat dhe obligimet e tyre zyrtare”, ka shkruar Sveçla për vizitën e sotme.
Ai me këtë rast, i ka falënderuar ata për zellin e treguar deri tani dhe i ka inkurajuar që së bashku të punohet drejt shtrirjes së plotë të rendit dhe ligjit edhe në atë zonë.
“Ministria e Punëve të Brendshme dhe gjithë Qeveria e Kosovës do të jenë me qytetarët dhe me institucionet e vendit me qëllim të garantimit të sigurisë dhe mirëqenies të secilit veç e veç dhe të gjithëve së bashku”, ka thënë mes tjerash ministri Sveçla.
Më 31 korrik, një ditë para zbatimit të vendimeve nga Qeveria e Kosovës, serbët lokalë të organizuar nga strukturat kriminale kanë vendosur barrikada në rrugët që çojnë në pikëkalimet kufitare mes Kosovës dhe Serbisë – Jarinjë dhe Bërnjak.
Beogradi zyrtar nuk e ka mirëpritur hapin e Qeverisë së Kosovës për zbatim të vendimeve për targat dhe këto dokumente, por Shtetet e Bashkuara dhe Bashkimi Evropian, kanë theksuar se Kosova është në të drejtën e saj dhe po vepron në linjë me marrëveshjen e Brukselit./KosovaNews/
