Qeveria e Republikës së Kosovës, me propozim të Ministrisë së Ekonomisë, gjatë mbledhjes së 91-të, mbajtur në formë elektronike, ka miratuar vendimin për shpalljen e masave emergjente në furnizimin e energjisë. E ky vendim sot pas një debati mjaft të gjatë mes pozitës e pozitës, mori mbështetjen e shumicës së deputetëve dhe u miratua në Kuvend të Kosovës.
Qeveria e Republikës së Kosovës tri ditë më parë mori vendim që të shpallen masat e emergjencës në furnizimin e energjisë, e shtyer nga gjendja aktuale botërore energjetike: rritja e shpejtë e çmimit të importit të energjisë, si dhe paralajmërimi i ndalimit të eksportit të lëndëve fosile nga disa shtete evropiane që mund të ndikojë në rritjen e mëtejshme të çmimit të importit.
Në një njoftim për media thuhet se masat e marra do të mbesin në fuqi për 60 (gjashtëdhjetë) ditë pas aprovimit nga Kuvendi i Kosovës.
“Kuvendi mund të vazhdojë këtë afat për periudha të njëpasnjëshme prej 30 (tridhjetë) ditësh me shumicë të votave të deputetëve të Kuvendit të pranishëm në seancë, deri në 180 (njëqind e tetëdhjetë) ditë”, thuhet në njoftim.
Masa mbështetëse për qytetarët për sigurim të ngrohjes gjatë dimrit
Tutje Qeveria e Kosovës sqaron se me qëllim të sigurimit të energjisë së mjaftueshme gjatë dimrit dhe të mbrojtjes së interesit publik, masat e emergjencës, ndër të tjera, përfshijnë:
Masa mbështetëse për qytetarët me qëllim të sigurimit të ngrohjes gjatë dimrit;
Ndalimin e përdorimit të energjisë elektrike për mihjen e kriptovalutave;
Mbështetjen e Operatorit të Sistemit të Transmisionit dhe Tregut (KOSTT) për të ndërmarrë veprimet e nevojshme në funksion të ruajtjes së sigurisë së sistemit elektro-energjetik; dhe
Masa në kursimin e konsumit të energjisë elektrike nga të gjitha institucionet.
Ndonëse është thënë se do të ketë masa mbështetëse për qytetarët me qëllim të sigurimit të ngrohjes gjatë dimrit, këtu nuk janë dhënë sqarime se si dhe sa do të jetë mbështetja dhe pritet që detajet të bëhen të ditura më vonë, raporton KosovaNews.
Njëkohësisht, Qeveria e Republikës së Kosovës, veçanërisht Ministria e Ekonomisë thuhet se janë duke monitoruar situatën elektroenergjetike në Kosovë dhe ndërhyrjet e Korporatës Elektroenergjetike të Kosovës në përgatitjen e termocentraleve për sezonin e dimrit.
“Edhe pse termocentralet janë të stërvjetruara, menaxhmenti i KEK-ut së bashku me ekipet e mirëmbajtjes janë duke e bërë maksimumin që blloqet e termocentraleve të gjenerojnë energji elektrike të mjaftueshme për të mbuluar kërkesën vendore. Termocentralet e KEK-ut janë në funksion mbi 80% të kohës gjatë një viti, që është mbi mesataren botërore të punës së termecontraleve me thëngjill. Këto riparime na mundësojnë që ta mbajmë këtë mesatare të lartë të gjenerimit të energjisë dhe furnizim sa më të rregullt”, thuhet nga Qeveria.
Shumica e deputetëve i japin mbështetje
Sot deputetët për disa orë kanë shqyrtuar këtë propozim-vendim të Qeverisë së Kosovës për masat e emergjencës në furnizimin e energjisë. E kjo temë ka qenë shkak i përplasjeve mes deputetëve të pozitës e opozitës, të cilët kanë dhënë qëndrimet e tyre për këtë çështje.
Pas shterjes së debatit nga 75 deputet të pranishëm në seancën e sotme, me 61 vota për, asnjë kundër dhe asnjë abstenim, Kuvendi i Kosovës e ka miratuar propozim-vendimin e Qeverisë së Kosovës për masat e emergjencës në furnizimin e energjisë./KosovaNews/
