Ministri i Punëve të Brendshme, Xhelal Sveçla, në panelin për politikat e mbrojtjes dhe sigurisë të organizuar nga Lëvizja Vetëvendosje ndërsa ka folur për sulmin terrorist në Basnjkë, ka thënë se Serbia është ndarë e turpëruar nga ai ballafaqim.
Ai tha se kanë arritur ta mposhtin grupin e kryekriminelit Millan Radojiçiqit, shkruan Reporteri.net.
“Arritëm të mposhtim këtë grup terrorist por edhe t’i zotërojmë dëshmitë e planit të tyre, që ishte asgjë më pak se aneksim i 17% të territorit të Republikës së Kosovës. Do të ishim futur në një cikël të bisedimeve e negociatave e rinegociatave për çlirimin e territorit tonë, që plani tyne ka qenë që t’i detyrojnë të tjerët të futen mes nesh dhe atyre, ashtu siç ka ndodhur në praktikë në raste të mëhershme”.
“Nuk mund t’i ndaj të gjithë detajet e punës tonë në veri, por ju siguroj që ka qenë angazhim i gjithanshëm i pakursyer i të gjithëve, qeverisë, shumicës së deputetëve, organizatës tonë, kjo punë e përbashkët, ky koordinim ka rezultu mëse i suksseshëm me shumë sfida e vështirësi, por edhe shumë suksese”, ka thënë Sveçla.
Ai tutje tha janë mbyllur shumë rrugë ilegale që na lidhin me Serbinë.
“Kemi mbyllur shumë rrugë ilegale që na lidhin me Serbinë, deri tani 29. Kur po them rrugë ilegale, nuk po them shtigje malore, por po flas për rrugë që Serbia ndër vite i ka asfaltuar dhe nuk ka lejuar që ato të bllokohen ose të dëmtohen nga askush”, tha ai.
