Zyra Kombëtare e Auditimit ka publikuar raportin e auditimit të performancës me të cilën ka vlerësuar gjendjen dhe shërbimet e KRU-ve nga viti 2019 deri në 2021.
Sipas raportit “Ndikimi i investimeve kapitale në zvogëlimin e humbjeve të ujit dhe zgjerimin e shërbimeve të ujit tek qytetarët nga KRU-të”, procesi i planifikimit, realizimit dhe monitorimit të investimeve kapitale nga Kompanitë Rajonale të Ujësjellësit dhe Autoriteti Rregullator për Shërbimet e Ujit nuk është menaxhuar mirë, duke ndikuar që objektivat e synuara të mos arrihen me kohë dhe në mënyrë të duhur.
“Planifikimi i investimeve kapitale nga KRU-të është përcjell me disa mangësi si: mungesa e Planit të Menaxhimit të Aseteve dhe Planit Afatgjatë të Investimeve; mungesa e arsyeshmërisë së qëndrueshme të investimeve; mungesa e prioritizimit të projekteve; si dhe mos harmonizimi i Biznes Planit Rregullator dhe Planit të Biznesit”, thuhet në komunikatën për media nga ZKA.
ZKA ka dhënë 16 rekomandime, prej tyre 11 për Kompanitë Rajonale të Ujësjellësit, 4 për Autoritetin Rregullator për Shërbimet e Ujit, si dhe 1 rekomandim për Ministrinë e Ekonomisë.
“Rezultatet e auditimit tregojnë se humbjet e ujit janë evidente dhe rezultojnë me humbje financiare. Problemi i humbjeve të ujit për shkaqe teknike dhe kyçjeve ilegale si dhe vlerat e ujit të pa faturuar mbeten ende sfidë. Edhe pse kishte një zvogëlim të lehtë të humbjes së ujit, humbja mesatare e ujit gjatë vitit 2021 ishte 55%”, ka njoftuar ZKA.
