Një veturë e policisë dyshohet të jetë përfshirë në një aksident ku mbeti e lënduar një e mitur që po ngiste trotinet elektorit.
E mitura ka marrë trajtim mjekësore e për ngjarjen është njoftuar edhe Inspektorati Policor, shkruan lajmi.net.
IPK e ka suspenduar nga puna zyrtarin policor i cili u përfshi në këtë aksident.
“Ju informojmë se Inspektorati Policor i Kosovës (tutje IPK), me datë 08.08.2023, ka pranuar njoftimin nga Policia e Kosovës-Trafiku Regjional, DRP – Gjilan, se një veturë zyrtare e Policisë së Kosovës në kryerje të detyrës, ishte përfshirë në aksident trafiku me këmbësor. Hetuesit e IPK-së janë paraqitur në vendngjarje dhe kanë ndërmarr veprimet hetimore dhe kanë njoftuar Prokurorin e Shtetit të cilit i janë prezantuar të gjeturat e hetimit deri në atë faze”, tha IPK për Express.
Gjithashtu me udhëzim të prokurorit të shtetit rasti është hapur si “Rrezikimi i trafikut publik”.
“Me udhëzim të Prokurorit të Shtetit është hapur rasti penal “Rrezikimi i trafikut publik”, nga neni 370 i KPRK-së. Si pjesë e procedurës administrative hetimore për të dyshuarin, zyrtarin policor (ngasësin e automjetit), është rekomanduar masa administrative suspendim nga puna”, thuhet në përgjigjen e IPK-së.
Lidhur me këtë rast policia ka dhënë detaje edhe në raportin 24-orësh të saj.
Policia informoi se viktima fillimisht është dërguar në qendrën emergjente në Gjilan për t’u mjekuar e më në spitalin e Gjilanit.
“AKSIDENT TRAFIKU ME LËNDIME/ Gjilan, 08.08.2023 – 14:10. Raportohet për një aksident trafiku në mes veturës së policisë dhe një të miture femër kosovare, e cila ishte duke drejtuar një trotinet. Viktima është dërguar në qendrën emergjente në Gjilan për tretman mjekësor e me pas ka vazhduar tretmanin në spitalin e Gjilanit. Në lidhje me rastin është njoftuar prokurori dhe IPK-ja”, ka njoftuar policia.
